Insiamṭhat tum Quartararo

MotoGP champion lai Fabio Quartararo-a'n tun hnaiah beisei a phak lo a, bike intlansiakna sang berah hian hmahruaitu la ni mek mah se insiamṭhat a mamawh. Inelna an neih leh hma ngeiin a ṭhat tawk lohna lai siam ṭhat a tum.

Assen GP-ah a tlan tluan thei lo a, intlansiak hnuhnung ber British Grand Prix-ah khan pariatna a ni bawk. Championship table-ah Aleix Espargaro chuan a rawn hnaih tawh viau, intlansiak vawi khata point 25 hmuh theih a nih avangin a dinhmun a him lo.

Yamaha rider Quartararo chuan, "A nihna tak sawi chuan season tirah khan kan bike hi ka sawisel, a chhan chu season hmasa nena khaikhin team dangin nasa takin hma an sawn a, keini chuan kan ti danglam ve teh vak lo niin ka hria.

"Nomawi humhim hi thil awlsam a ni dawn lo, amaherawhchu thil theih loh erawh a ni lo. Keimaha a ṭha ber kha a rawn lan chhuah a ngai, a sang ber thleng leh turin insiamṭhat pawh ka mamawh hle a ni," tiin a sawi.

Bike leh inelna chungchang sawi zuiin Quartararo chuan, "Argentina leh Assen-a intlansiak kan neih zawh kha chuan beiseina a chau tawh hle, tun season chhungin chak ni hmel ka hmu ve tawh lo mai ang tih pawh ka hlau hman.

"Mahse, Portugal-ah ka chak a, a hnu lamah hma ka sawn viau bawk. Season tir ai khan inelna a hautak tawh zawk a, chuvangin intlansiak kan neih leh hma ngeiin a fuh lo lai zawng zawng siamṭhat vek a ngai," tiin a sawi.

Bike intlansiakna sang ber MotoGP hi August 21, Pathianni hian Red Bull Ring-ah an tlan leh dawn. Motorrad Grand Prix von Osterreich hnuah hian inelna dang pasarih neih leh tura ruahman a ni bawk.