A ṭha zawk nih ka ngai - Raducanu

US Open champion lai Emma Raducanu chu National Bank Open first round-ah a chak lo. New York khawpui pan tura inbuatsaihna a nei ṭha lo a, inelna lian hmachhawn turin tun aia ṭha zawk nih a ngaih thu a sawi.

British number 1 hian Camila Giorgi chu 7-6 (7-0), 6-2 in a ngam lo. World number 10 lai ni mah se Raducanu hian a khel ṭha tawk lo, a khingpui Italian player hi champion lai a nih bawk avangin hmachhawn a awlsam lo ve bawk.

Kum 19 mi Raducanu chuan, "A nihna tak sawi chuan ka khel chhe hran loin ka hria. Amaherawhchu, tun aia ṭha zawka khelh chu ka ngai tih a chiang, ka che rang tawkin loin ka ball vuak a fuh tawk lo bawk," tiin a sawi.

Kar hmasa khan Citi Open-ah Raducanu hian quarterfinal a thleng. Season hmasa ang bawkin hard court-ah a khel ṭha leh dawn niin a lang hman, mahse beiseina a neih san lai takin a tlahniam leh ta rih.

Inkhel dangah Coco Gauff chuan amah ang bawka American player Madison Brengle chu 6-1, 6-3 in a hneh, a match lehpekah chuan Wimbledon champion Elena Rybakina a hmachhawn ang.