Match hmasa berah Murray a tla nghal

Andy Murray chu Candian Open a match hmasa berah a chak lo. World number 1 hlui a chak loh lai hian amah ang bawka British player Cameron Norrie erawhin second round a inhlangkai thung a ni.

Nimin zing inkhelah Murray hian American player Taylor Fritz chu 6-1, 6-3 in a hneh lo. Vawi thum a champion tawhna hmunah Murray hi a che fuh hleithei lo a, a duh leh beisei angin US Open inbuatsaihna a nei ṭha thei lo.

Ruah sur vangin inkhelh hun hi darkar 24 ngawta tih tlai a ni, ni khat ngawtin an sawn tlai tihna a ni. World number 13 Fritz-a'n a tir aṭangin match a thunun hneh viau a, set hnihnaah Murray rawn kang ve deuh mah se tualchhung tlangval a dingchang ta tho a ni.

Inkhel dangah Norrie chuan Brandon Nakashima 6-4, 6-4 in a hneh. British number 1 hian hnehna chang turin darkar khat leh minute 13 bak a mamawh lo, a match lehpekah chuan Hugo Gaston hnehtu Stefanos Tsitsipas a hmachhawn leh ang.

World number 5 Stefanos Tsitsipas hian inkhel dangah Gaston hi 6-2, 6-3 in a lo sawp ve bawk. Tun hnaia thawn rawn nei lian ve leh tak Nick Kyrgios pawhin Sebastian Baez chu 6-4, 6-4 in a hneh ve bawk.