Arsenal-a ka cham chhan chu Arteta - Xhaka

Granit Xhaka chuan tun hma deuh khan Arsenal chhuahsan tura rilru a siamfel hman thu a sawi a, chhuak loa a cham leh chhan chu manager thar Mikel Arteta nena an inbiak vang a nih thu a sawi tel bawk.

Kum 2019 October thla a ni a, kha tih laia Arsenal manager Unai Emery hoin Emirates Stadium-ah Crystal Palace an mikhual. He inkhelah hian Xhaka chu thlak a ni, khelmual a chhuahsan dawnah Gunners fans lamin an auel hial.

Switzerland international hian ngawi rengin a en liam mai bik lo, fans ho thawm chu tih el let nan a beng a dawh khum - khelmual aṭanga a chhuah pah hian a jersey hak lai chu a phelh nghal bawk a ni.

Xhaka hi Arsenal captain nihna hlihsak a ni a, khelmual chhunga tihsual a neih foa avangin fans lamin an lawm lo. Tun hnai khan Jose Mourinho enkawl AR Roma nen pawh thui tak an indawr leh hial a, mahse chhuak loin a cham ta zawk.

Kum 29 mi Xhaka chuan, "Mikel Arteta hi Arsenal tana ka khelh zel chhan chu a ni. Player leh club tana hna thawkte hian kum thum liamta khan chhuah ka duh a, he club hi ka mangṭha hman tawh tih an hre vek.

"Kan hnena a rawn kal khan ngun takin kan titi dun a, ka rilrua thil awmta leh ka ngaihdan pawh tlang takin ka hrilh. Amah hi mimal takin ka hre sa ngai lo, kan inkhel ho ngai lo a, min la kaihruai ngai bawk hek lo, a hming erawh ka hria.

"Ani chuan thla ruk chhung min nghak rawh, chumi hnuah cham chhunzawm zel chhan tur i hre lo a nih chuan i chhuak dawn ni, min ti. Keimah min pui tur leh min thlawp tur a nih thu min hrilh bawk, chumi rah chhuah chu tun hun hi a ni," tiin a sawi.

Borussia Monchengladbach aṭangin Xhaka hian 2016 khan Arsenal hi a zawm a, player senior leh Emirates Stadium-a hun hmang rei berte zinga mi a ni der tawh, club tan hmun pawimawh a chang leh tawh a ni.

Xhaka chuan, "Kei, Rob Holding leh Hector Bellerin te chauh hi kum ruk liam ta vel aṭanga Arsenal tana khel la awm chu kan ni, midang hi chu a hnu lama rawn lang an ni hlawm. Hun rei tak ka cham tawh tih ka hriat hi chu ka lawm hle ṭhin.

"Mikel hian thil tum mumal tak a nei a, chumi tur chuan tunah hian hma kan la mek. Tunah hian kum hnih daih contract ka nei mek a, chumi hnu lam erawh ka la ngaihtuah thleng thei rih lo, hunin a la hril ang chu," tiin a sawi.

Arsenal hian Premier League season bul an ṭan fuh, an match hmasa berah Crystal Palace chu 2-0 in an luhchhuah. Tun kar tawp hian Emirates Stadium-ah Leicester City an lo mikhual ve thung ang.