MotoGP an tlan dawn ta Marquez leh Rossi an inpeih

Season ṭan hun tura an ruahman chu thla li chuangin a pel tawh. Covid-19 vanga inelna neih theih loh mai a hlauhawm hnuah MotoGP chu Pathianni tlai dar 5:30 hian Spanish Grand Prix an tlan dawn.

Bike intlansiakna sang ber season khuh hawnna hi Jerez tlan kawngah an tlan dawn. A hmun ngaiah bawk hian July 26-ah intlansiak pahnihna an nei leh ang, chumi hnuah Czech Republic leh Austria-ah an tlan zui leh ang - a hmuna entu an awm lo ang.

Champion lai Marc Marquez chuan a vawi sarih nan title lak leh a tum thu a sawi a, legend Valentino Rossi pawhin a tan season hnuhnung ber a la nih loh a beisei - MotoGP huangah a cham chhunzawm a rinna chu 99% a nih thu a sawi ve bawk.

Kum 27 mi Marc Marquez-a'n 2013, 2014, 2016, 2017, 2018 leh 2019 te khan hlawhtlinna a chang tawh, tunah hian vanglai hmang mekin Honda bike nen beiseina sang tak nen a inlan dawn - rider dang tan a tawrhhlelhawm lehpek khawp ang.

Marquez-a nau Alex chu kuminah kan hmu ve dawn, season hmasa Moto2 champion a nih avangin midang tan elpui haktak a tlin phak a rinawm; Spanish unau hian engtiang takin nge season an hman dawn tih chu hriat châkawm tak a ni.

MotoGP inelna pangngai an tlan hnuhnung ber aṭangin thla riat a liam tawh; February thla hnua a vawi khat nan practice pawh an nei leh tawh. A hmunah entu fans an awm dawn lo a, ṭum danga intlansiak boruak nen chuan a danglam dawn.

Valentino Rossi hi kum 41 mi a ni tawh a, tun season bak hi Monster Yamaha tan hun a nei tawh lo - 2021 aṭang chuan Yamaha hian rider dang an nei dawn tih an sawi chiang tawh. Italian rider hian MotoGP chhuahsan erawh a la tum lo.

Rossi chuan, "Intlansiak ka la duh reng, ka team pangngaiah awm chhunzawm lo mah ila team ṭhenkhat nen chuan kan inbe tawh. MotoGP-ah ka cham chhunzawm dawn leh dawn loh chu chiang vek lo mah se, ka awmzui theihna chance 99% a ni," a ti.

Italian tlangval hian 2001, 2002, 2003, 2004, 2005, 2008 leh 2009 te khan world title a la a, a vanglai chuan midang chunga leng a ni. Mahse, rider ṭha dang an rawn chhuak zel, tun hnaiah chuan a zuih ve ta hle; 2017 hnu lamah intlansiak malah hnehna chan a la nei leh lo.