Vawiinah I Day Football Semifinal

Chawhma dar 11:30-ah FC Venghnuai leh Mizoram Police
I Day Football 2022-ah MPL club pariat zing aṭangin team pali chauh an dam tawh a, group stage aṭangin team pariatte intluk tawkzia a lang a, semifinal pawh a hmuhnawm dawn.

Vawiin chawhma dar 11:30 hian Lammualah champion rinkai Mizoram Police leh FC Venghnuai an inhmachhawn dawn. Mak ang reng tak erawh FC Venghnuai hi an group-a pakhatna zawk an ni a, Police hi vannei taka pahnihna ni chunga semifinal thleng an ni thung.

Venghnuai bûk a rit
Inelna ṭan tirhah Mizoram Police leh Venghnuai hi inkhel ta se, Police bûk a rit zawk dawn. Group stage an khelh dan aṭanga thlir chuan Venghnuai bûk a rit ta thung.

Venghnuai hian ṭantu an nei ṭha a, coach chhuak thar zinga inzir peih leh ngaihtuahna seng nasa Lalrindika Hmar an kawl hi an ṭhatpui - match tinah hmasawnna hmuh tur a awm.

Group match hnuhnung berah Venghnuai hian Aizawl FC 3-1 in an hneh a, hei hian inrintawkna lian tak a pe ang. Goalkeeper Joel B. Lalramchhana hi Venghnuaiin kumin MPLU18 an champion ṭuma best goalkeeper kha a ni a, a ke hman thiam avangin coach Rindika'n a hmang chhunzawm. Match hmasa lamah talbuai deuh mah se puitling zingah a tlangnel ta hle.

Venghnuai hian Chawnpui 2-1 a hneh loin bul ṭan mah se FC Bethlehem 5-1 in an lehthal a, Aizawl FC 3-1 in an hneh leh bawk. Rindika hote hian clean sheet an la nei lo a, tlarhnung thuam ṭhat erawh an la mamawh zel. Tlarhnunga Ruatfela leh Nunsiama te inkawp thlawp turin Lalruatfela (RF-a) an lalut a, an tifuh hle.

Midfield-ah player nung ṭha Zemabawk North tlangval Peter Nunhlima leh India junior team tan pawha tawnhriat nei ṭha Eric Remruata-te an inkawp thei a, tlarhmaah top scorer ni mek Apuia awmin mual sir aṭangin C. Nuna leh Vanlalthanga ten an thlawp bawk.

Venghnuai captain VL Thanga hi a fitness a ṭha a, ball a pet thiam bawk avangin an goal nawrna pakhat a ni a, best player ni thei tura zinga mi a nih avangin Police tan pawh ven uluk a ṭul ang.

Police an ni tlat
Mizoram Police hi hliam leh damlohnain a tlak buak a, an training rei tawh ngaihtuahin hmasawn lam aiin tlakhniam lam an pan a ang mah zawk. Nomawi an chawi theih nan coach Lalbiaksanga Colney-in team boruak a chawh phur ran a pawimawh a, Police hi an insiamṭhat ran loh chuan final lut lo thei dinhmunah an ding.

Mizoram keeper ṭha F. Lalmuan-awma an kawl chungin Police-in goal ruk tehmeuh an chhuah a, forward Malsawmfela ke hmui zarah semifinal an thleng hram a ni ber.

Police hian game mawi khel thei tur player an kawl a, game mawi an khel thei ta lo a nih pawhin chakpui thei tur player chu an kawl chiang a ni.

H. Lalbiakthanga, Lalbiakhlua (Biaktea), Lalfakzuala, Lalrinzuala Khiangte, Sawmfela leh Police player dangte hi club danga hmun pawimawh chang thei tur ṭhiau an ni a, hemi a nih avang hian FC Venghnuai pawh an fimkhur a ṭul.

An khelh dan thlirin Venghnuai bûk rit zawk mah se player thlirin Police bûk a rit zawk - inkhel class sang kan beisei thei a, semifinal hmasa zawk a hmuhnawm dawn.

Aizawl FC hmaa ding tur Chhinga Veng
I Day Football semifinal hnuhnung zawkah Chhinga Veng leh Aizawl FC te an inkhel dawn a, tlai dar 2:00-a Chhingcows laka I League club fiahna hi tualchhung football ngainatute hmuh châk a ni.

Inelna hi Zonet Rihnimah en theih tura pek chhuah a ni a, online hmanga en duh tan Zonet Empai aṭangin a en theih bawk. Aizawl FC-in social media lamah nasa takin hma an sawn a, Inter Village 2022 hmang ṭangkaiin transfer laia uar taka an player puanzar zingah Champhai Kanan champion puitu best player Lalram-sanga leh top scorer R. Ramdinthara te pawh an tel.

Player langsar pahnih hian training an zawm tlai avangin khelhna hun an la ngah lo a, I Day Football-ah bik chuan player naran chauh an la ni. Inter Village-a goal 13 khung thei Tharpuia'n goal a la khung lo a, Ramsanga'n minute 90 a khelh ṭumah AFC-in FC Venghnuai 3-1 meuhin an hneh lo.

Aizawl FC coach Lalrozama Fanaiin tlarhnung rem phui dan a ngaihtuah a ṭul a, tlarhnunga Lalmuanawma (Munez) kawppui tura right back-a khel ṭhin captain Immanuel HS Lalṭhazuala a dah chu a fuh ber em, tih chu zawhna awm thei a ni.

Chutihrualin midfield-ah pawh tlarhnung lam aṭanga ball sem nuam ti pahnih KC Larchhuaka leh Ramsanga te an awm kawpin an goal bawh a nat loh phahah a ngaih theih. Midfielder dang K. Lalrinfela (Mafela) leh K. Lalhmangaihkima te hi bench-a dah atan an uiawm a, coach tan lu haina tham a tling.

AFC hian attacking player pawh an ngah hle. Semifinal-ah Tharpuia'n bul a ṭan mai thei a, amaherawhchu coach Rozama thlan tur zingah MS Dawngliana, Jacob Vanlalhlimpuia, Augustine Lalrochana, Jeremy Laldinpuia, David Lalhlansanga, Lalrosanga leh Jessy Vanlalmuana te an awm a, thlan thiam a har khawp ang.

Chhinga Veng erawh tualchhung football-a tawnhriat nei ṭha pahnih Lalremruata leh Anand Gurung te enkawl an ni bawk a, an player naupang deuh mah se an match hmasa bera Mizoram Police an hneh loh ṭum aṭangin awmze nei takin an khel tawh.

Chhingcows hian goal hnih chiah an la chhuah a, an match hnuhnung pahnihah an clean sheet avangin tlarhnung a phui ṭha tih a lang. Goalkepeer RS Lallawmzuala hi I Day Football-a best goalkeeper ni lai a ni a; a kum la naupang mah se Chhinga Vengah erawh player tawnhriat nei ṭha ber pawl a ni pha.

Remruata'n an team budget milin a chhawr theih tur player a la khawm a, Lunglei leh Serchhip lamte hrut kualin Under 18-a an player pawimawhte squad tihchhah nan a hmang. Chutihrualin Chhinga Veng hian tunlai striker 'hot' pawl Lalrinzuala an kawl a, Aizawl FC aiin an squad pan zawk mah se dah hniam ngawt theih an ni lo.