Leeds-in point 1 chiah mamawh

Leeds United chuan Nilaini zan khan Barnsley 1-0 in an hneh a,  season thara Premier League khel turin point khat chiah an mamawh tawh. 

Elland Road-ah Leeds-in inkhel thunun mah se chak turin vanneihna an mamawh a, goal awmchhun hi minute 28-naa Barnsley defender Michael Sollbauer-a'n an lama a tih luh a ni.

Leeds hian Derby County leh Charlton an la hmachhawn dawn a, point khat hmuh hi a harsa tawh lo. Vawiin tlai dar 5:00 hian pathumnaa awm Brentford-in Stoke City an tlawh dawn a, Brentford hi an chak zo lo a nih chuan Leeds hian an inkhelh leh hma hauhin Premier League khelh theihna ticket an nei ang.

Nizan khan pahnihnaa awm West Brom-in Huddersfield an hmachhawn bawk. Leeds manager Marcelo Bielsa chuan an elpui West Brom leh Brentford inkhel a en dawn lo. Argentine manager Bielsa chuan, "Chhiarkawp dana kan him hma chu Premier League chungchang ka la sawi ngam lo. Kan tum ram kan thlen hunah chuan keimah chauh ni loin player, staff leh Leeds khawpuia cheng zawng zawng hian awm ngaihna kan hre lo ang," tiin Premier League khelh a châk thu a sawi.

Leeds neitu Andrea Radrizzani  chuan, "Entu tel lo chuan football hi a hlu tawk lo. Chutihrualin Covid-19 vangin harsatna kan tawk mek a, Championship-a kan champion emaw Premier League khel tura kan tling a nih pawhin fan-te in lama tawm im turin ka ngen a ni," tiin supporter-te hnenah ngenna a siam.