Leicester leh Man United an chak

Premier League-ah match hnih chauh khelh a ngai tawh chungin Champions League khel tur a la hriat theih loh. Europe-a inelna sang ber khelh tum pahnih Leicester City leh Manchester United te chuan Nilaini zan khan Sheffield United leh Crystal Palace te 2-0 ve ve in an hneh.

Foxes leh United hian point 62 ve ve an hmu a, Brendan Rodgers hote hi goal difference-ah goal thuma an ṭhat zawk avangin palinaah an awm. Pathianni zan dar 8:30 hian Leicester City-in Jose Mourinho hote hmachhawn turin Tottenham Hotspur Stadium an tlawh dawn. Foxes-in league match tawp bera Manchester United an mikhual hunah an goal difference ṭhatna hmang ṭangkai turin Spurs an hneh phawt a ṭul ang.

Leicester City hi Bournemouth lakah 4-1 zeta an mualpho hnuah an insiamṭha a, Nilaini zan khan Sheffield Untied 2-0 in an hneh. Foxes tan hian Ayoze Perez leh Demarai Gray ten hun chanve hmalam leh hnulamah an khung.

Foxes manager Brendan Rodgers chuan, "Hnehna kan chan avangin Premier League champion ṭum tih lo a, club history-a kan dinhmun ṭhat ber ṭum a ni. Amaherawhchu hetah hian kan duh tawk lo - kan match hnuhnung pahniha chak a, history siam belh kan duh," tiin season thara Champions League khelh ngei an tum thu a sawi.

King Power Stadium-ah Leicester City an khel ṭha a, Tottenham leh Wolves hnehtu Sheffield lakah inkhel an thunun. Blades keeper Dean Henderson-a'n Foxes winger Harvey Barnes goal khung tur a dansak a, goal tam zawk an khung loh phah.

Rodgers-a'n Sheffield United hmachhawn turin kum 19 mi Luke Thomas chu inkhel bul a ṭantir a, English wing back hi Ben Chilwell inhliam vanga lut ni mah se inkhel bul ṭan tlak khawpin a ṭha tih a pholang. Thomas hian Ayoze Perez goal khung tur a siamsak a, minute 90 chhung a khel bawk.

Manchester United hi Southampton nena an inhnehtawk hnuah Crystal Palace 2-0 in an hneh a, Leicester City leh Chelsea tan pressure an siam zel. United tan hian Marcus Rashford leh Anthony Martial ten an khung.

Selhurst Park-ah United tan chak a awlsam lo a, Palace forward Wilfried Zaha-a'n a club hlui tlarhnung tan harsatna a siam tam hle. Eagles an vanduai a, first half-ah Zaha hi box chhungah Victor Lindelof-a'n ti tlu mah se penalty

pek an ni lo a, minute 55-naah Jordan Ayew-a'n siphurh sutna goal khungah inngai mah se VAR hmanga ennawn a nih hnuah pawm a ni lo.

Zaha ball pek ṭha zet chu Ayew hian goal-ah a chantir a, amaherawhchu ennawn a nih hnuah Ayew ke hmawr a offside - an vanduai takzet. Palace chairman Steve Parish chuan, "VAR a ṭha lo a mi?" tiin Zaha-a'n penalty a phu thu twitter-ah a ziak.

Palace manager Roy Hodgson chuan, "Thutlukna hrang hrang thlir khan vanneihna pathianin min hawisanah ka ngai," tiin an vanduai thu a sawi. United tan erawh VAR hi vanneihna a ni a, an lama goal lut pasaih zet chu VAR hmangin sut a ni a, hemi kawngah hian Southampton leh Brighton te nen hmahruaitu an ni.

Solskjaer-a'n Luke Shaw leh Brandon Williams te inhliam vangin an chhawr thei lo a, Timothy Fosu-Mensah-a'n inkhel bul a ṭan. Dutch defender hi Diogo Dalot aiah thlan a ni a, May 2017 hnuah a vawi khat nan United tan inkhel bul a ṭan. United hian tlarhmaah player ngai a hmang a, defensive midfielder Scott Mc Tominay chu Nemanja Matic aiah inkhelh bul ṭantir a ni bawk.

United manager Solskjaer chuan, "January thlaah kha chuan a sang pali tumahin a sang palia kan awm theih an ring tawh lo. Tunah erawh beiseina sang tak kan nei a, inelna ṭan leh hnuah kan khel ṭha. Manchester United kan nih avangin player-te pawh an rilru put hmang a danglam tur a ni," tiin a sawi.