Foxes khingpui tur Spurs

Leicester City-in Pathianni zan dar 8:30-ah Tottenham Hotspur an hmachhawn dawn a, Sheffield United an hmachhawn ṭum ang thoin Foxes hi an kim dawn lo.

Leicester-in an player pathum midfielder James Maddison leh defender pahnih Ben Chilwell leh Christian Fuchs te chu inhliam vangin tun season-ah an chhawr thei dawn lo. Foxes hian hrem vangin defender pawimawh Caglar Soyunku leh hliam vangin Ricardo Pereira te chu tun season-ah an hmang thei dawn lo.

Brendan Rogers chuan, "James, Ben leh Christian te hi tun season-ah an inlan thei tawh lo ang. Marc Albrighton pawhin hliam vangin Tottenham a hmachhawn theih a rinawm lo a, Manchester United kan hmachhawn hunah a la khelh theih kan beisei," tiin hliam an ngah thu a sawi.

Foxes hian Spurs an hneh thei a nih chuan Rodger-a hote hian season thara Champions League khel turin match hnuhnung bera Manchester United hneh a tawk ang. Amaherawhchu an khingpui tur Spurs manager Jose Mourinho hi goal venhim thiam a ni a, Leicester hmabak a awlsam dawn lo.

Spurs hian an match hnuhnung berah Newcastle United 3-1 in an hneh a, Harry Kane-a'n goal hnih a khung. English striker ṭha mi Kane-a goal khung chanchin hi Leicester tan hriat nuam a ni lo ang. Mourinho hoten Europa League an la beisei avangin Foxes ang thoa chak mamawh a ni a, inkhel a hmuhnawm dawn.