Mizoram Vs A Dang Zawng!

Kan nghak chhuak ta - vawiin tlai dar 2:30 hian Rajiv Gandhi Stadium, Aizawlah Mizo player ṭha thlanchhuah leh India ram hmun dang aṭanga player ṭha thlanchhuah an inkhel dawn.

Hei hi Mizorama a vawi khat thlenna a ni a, a thlen nawn hun tur a hriat tawh loh avangin football tui chin tan chuan Mualpui pan tawp mai tur a ni. Dar 1:30-ah entertainment programme ṭan a ni dawn a, dar 1:00 velah ṭhut tawh a fuh ang.

Football Players' Association of India aiawh FPAI XI-ah Newcastle United striker hlui Michael Chopra a tel dawn a, Mizoram XI-ah India striker Jeje Lalpekhlua a khel dawn. A sawifiah dan awlsam ber chu RG Stadium-ah India rama player ṭha rual an inlar dawn. Hei chauh hi a ni lo, halftime laiin a vawi khat nan Mizoramah India ram pum huap award semna neih a ni bawk ang.

An ti tak tak
Football season-ah chuan tun hi chawlh hun lai a ni a, chutichung chuan Mizoram XI chuan ṭha takin practice an kalpui a, chak tumin an thawkrim.

RG Stadium-a Jeje, S. Malsawm-tluanga, Lalrindika Ralte, Samuel Lalmuanpuia leh Malsawmzuala-te inthlawp tur chu mitthla ringawt pawhin a hmuhnawm dawn tih a hriat. I League club khatah Mizo player ṭha rual hi an khelh ho vek dawn loh avangin hmaih phal chi a ni lo.

Phai lama player ṭha kan hriatte hi Mizorama player ṭhate nen an khel ho dawn a, an tum a inang vek dawn. An tum chu Mizoram hmingṭhat nana chak tuma khelh a ni.

Mizoram captain Mama chuan, "Chawlh lai pawha training hi chu a hahthlak ṭhin a, amaherawhchu Mizoram tan a nih chuan a dan a dang ṭhin. Chak tumin kan khel dawn a, theihtawp kan chhuah ang," tiin Vanglaini a hrilh.

Mohun Bagan striker Jeje pawhin exhibition match khelh tur hi a la thutak hle. Hnahthial tlangval hian training-naah a theihna zawng zawng a chhuah a, grassroots naupang an tihpui pawhin an thiam ngei theih nan duhsak takin training a pe a, grassroots coach-te hnehah pawh thurawn ṭha tak tak a pe bawk.

India striker Jeje a hmuhnawm ngei a rinawm a, Aizawl FC champion puitu R. Laldanmawia leh Brandon VL Remdika te chu fitness ṭha ber zinga mi an ni a, team chakpui thei player an la ni. A pawimawh ber lai chu coach Danny Lalduhawma leh assistant coach Samson Ramengmawia ten chak loh an hreh hi a ni.

India chhuanvawr
FPAI XI thlan chhuah player-te hi India ramah chuan ber kai ni pha an ni a, keeper Subrata Paul leh defender Deepak Mondal te chu India tana captain tawh ni ringawt loin infiammi chawimawina sang Arjuna Award hial dawng thei an ni.

FPAI president Renedy Singh chuan, "Mizoram XI-in training an nei ṭha tih kan hria a, chuvangin he mi khingpha thei tur player kan ko a ni," tiin chak loh an tum loh thu Vanglaini a hrilh.

Indian footballer zinga ball pet thiam ber zinga mi Renedy thusawi hi an palyer thlan dan hmangin a dik tih nemngheh a ni a, tla rhmaa I League khelh zawh taka Indian zinga goal khung tam ber CK Vineeth leh English striker Chopra inkawp tur hi ven uluk a ṭul ang.

Heng player ṭha pahnih thlawp tur hian winger ṭha pathum Seityasen Singh, Jackichand Singh leh Holicharan Narzary te an nei a, Aizawl FC tlarhnung phuina chhan midfield aṭanga tlarhnung pui thiam Alfred Jaryan an kawl. Indian foootball-ah foreigner-in danglamna an thlen ṭhin a, FPAI XI-in foreigner pahnih an nei tih hriat a ṭha.

Tlarhnung lamah Deepak Mondal bakah Gouramangi Singh, Narayan Das leh Pritam Kotal te an awm bawk. Mizoram XI hmachhawn tura Mizoram rawn zinte hi India ram huapah chuan Mizo player-te aiin an hming a langsar zawk a, tu nge thiam zawk tih chu khelmual chhungah a hriat thung ang.

Indian football legend pahnih - Baichung Bhutia leh Renedy Singh-te'n mikhual team hi an ho dawn a ni.

FPAI XI-ah Subrata & Jacki tel
Football Players Association of India-in Mizoram XI hmachhawn tur an puan hmasak berah Subrata Paul an telh lo a, amaherawhchu India keeper lar Subrata hian exhibition match hmachhawn turin Mizoram a rawn thleng tawh.

Subrata bakah hian I League best player atana thlan tawh Jackichand Singh leh East Bengal player hlui Naoba Singh te an rawn tel belh bawk. FPAI XI hi an ṭha sawt dawn a, chutihrualin Mohun Bagan defender Anas Edathodika leh midfielder Jewel Raja te erawh harsatna an neih vangin Aizawlah an rawn kal ve thei lo.

Ticket, parking, free entry!
Ticket hi dar 11:00 aṭangin Zero Point, Mual­puiah lei theih a ni ang. Inivitation Card leh ID Card nei chauhin RG Stadium kawtah lirthei an dah thei ang. Mipui tan R. Dengṭhuam­­a Stadium kawt leh 3rd MAP compound chhung (Parade ground ni lo) bakah World Bank road kawngpui sirah lirthei dah thei a ni. AIFF-MFA hnuaia grassroots leh SSA hnuaia grassroots te chuan an jer­sey hain a thlawnin exhibition match an en thei ang.

Mizoram captain Mama
Mizoram XI tana captain tur chu S. Mal­sawmtluanga a ni a, India striker Jeje Lalpekhlua chu vice captain a ni ang. Aizawl FC defender Lalramchullova leh Shil­long Lajong midfielder Isaac Vanmalsawma te chu India Under 23 ṭanga paih an ni a, Mizoram XI squad-ah telh nghal an ni.

Mizoram XI
J. No. Hming Club
Goalkeepers
1 Lalthuammawia Bengaluru FC
22 Lalmuanawma Chanmari FC
Defenders
5 Zohmingliana Ralte Aizawl FC
19 Robert Lalthlamuana East Bengal
65 Sena Ralte Bengaluru FC
3 Lalrinchhana Tochhawng Chanmari FC
4 Lalrinzuala Khiangte Aizawl FC
3 Lalchhuanmawia ONGC, Mumbai
23 Lalhmunmawia Mizoram Police FC
27 Lalramchullova Aizawl FC
Midfielders
28 S. Malsawmtluanga Southern Samity
20 Lalrindika Ralte East Bengal
17 R. Laldanmawia Aizawl FC
30 Malsawmzuala Bengaluru FC
9 Lalrinchhana Chanmari FC
11 Lalfakzuala Mizoram Police FC
10 Brandon VL Remdika Aizawl FC
13 Isaac Vanmalsawma Shillong Lajong
Forwards
12 Jeje Lalpekhlua Mohun Bagan
21 Samuel Lalmuanpuia Shillong Lajong
16 F. Lalrinpuia Mizoram Police FC
49 William Lalnunfela Aizawl FC
* Player-te khelhna club hi an khelhna hnuhnung bera an inziah luhna anga dah a ni.
Coaching Staff
Manager R. Lalramzauva
Asst Manager RK Rozidinga
Coach Danny Lalduhawma
Asst Coach Samson Ramengmawia
Physio Abhisag Vantluangpuii