Final-ah Germany vs Chile

FIFA Confederations Cup final chu July 2, Pathianni zan dar 11:30 hian Germany leh Chile ten Saint Petersburg Stadium-ah an khel dawn a, Sony Six leh Ten 2-ah a en theih ang.

Nomawi inchuh tur Ger­many leh Chile hi group stage-ah inhmachhawn tawh a, 1-1 in an inhnehtawk. Zaninah erawh minute 90 chhunga chak zawk an awm lo a nih chuan extra time khelh a ni a, an la inhnehtawk fo chuan penalty shootout pet a ni tawh ang.

Champion ngai lo

Germany hian 1996 Euro an champion avangin 1997 Con­federations Cup khel turin an tling a, 2002 FIFA World Cup-ah pahnihna an nih avangin 2003 Confederations Cup khel thei dinhmunah an ding leh bawk. Amaherawhchu, Die Mannschaft hian tel loh an thlan zawk avangin an aiah Czech Republic leh Turkey ten an khel a, Germany hian 2005-ah erawh inelna an thlen avangin a vawi khat nan an tel a, pathumna an ni.

Chile hian kum 2015 khan a vawi khat nan Copa America-ah an champion a, tun hi FIFA Confederations Cup an vawi khatna a ni. Team pahnih hi FIFA hnuaia khawmualpui champion-te inelnaah a vawi khat nan final an lut a, champion thar an awm dawn tihna a ni.

Intawnna hmasa

Group khatah Chile leh Ger­many hi an awm ho a, Kazan Arena-ah Die Mannschaft defender Shkodran Mustafi tih­sual vangin club tana a khelhpui Alexis Sánchez-a'n minute rukna lekah a khung nghal.

Kum naupang rual awm khawmnaah tawnhriat nei ṭha ber tura ngaih Mustafi-a'n vawi khat aia tam a tisual zui a, hemi hnu hian Gunners defender hi Cameroon leh Mexico an hma­chhawn ṭumin a inlan tawh lo.

Chile laka siphurh sutna goal khungtu Lars Stindl erawh Cameroon nen hahdamtir a nih hnuin Mexico nen semifinal-ah inkhel bul a ṭan a, Borussia Monchengladbach captain hi final-ah pawh a inlan beisei a ni.

South American champion lamah pawh captain Claudio Bravo chu group match hnu­hnung bera Australia an hma­chhawn aṭangin a inlan ṭan a, semifinal-a Portugal an hneh ṭumin player langsar ber a ni tawh.

Rinkai Chile

Chile-in team ṭha an nih zia Portugal lakah an pholang tawh a, Germany-in an neih ṭhat ber player an thawhchhuah pui loh avangin champion tura rinkai an ni.

Spanish coach Juan Antonio Pizzi hian tlarhnungah Mauricio Isla, Gary Medel, Gonzalo Jara leh Jean Beausejour te a rem a, Chile boss hian European champion laka goal an chhuah loh avangin a player-te khelh danah a lungawi hle.

Pizzi chuan, "Goal chance pawh kan insiam tam lo a, hetiang ang hun kan thlen hi chuan ka hlauthawng ṭhin. Penalty shootout-ah erawh goal-ah kan pet a, a lawmawm hlein ka hria," tiin semifinal zawhah a sawi a, tlarhma khelh danah a la lungawi lo.

Amaherawhchu, Chile hian Alexis Sanchez, Eduardo Vargas, Arturo Vidal leh Charles Aranguiz te an nei a, Germany tan buaina tham an tling ang.

Final Kalkawng
GERMANY
Group Stage
Australia 2 - 3 Germany
AUS : Tom Rogic 41'; Tomi Juric 56'
GER : Lars Stindl 5'; Julian Draxler 44'(P);
Leon Goretzka 48'
Germany 1 - 1 Chile
GER : Lars Stindl 41'
CHI : Alexis Sanchez 6'
Germany 3 - 1 Cameroon
GER : Kerem Demirbay 48';
Timo Werner 66’, 81’
CAM : Vincent Aboubakar 79'
Semifinal
Germany 4 - 1 Mexico
GER : Leon Goretzka 6', 8'; Timo Werner 59'; Amin Younes 90+1'
MEX : Marco Fabian 89'
CHILE
Group Stage
Cameroon 0 - 2 Chile
CHI : Arturo Vidal 81'; Eduardo Vargas 90+1'
Germany 1 - 1 Chile
GER : Lars Stindl 41'
CHI : Alexis Sanchez 6'
Chile 1 - 1 Australia
CHI : Martin Rodriguez 67'
AUS : James Troisi 42'
Semfinal
Chile 0 - 0 Portugal
Penalty-ah Chile 3-0 in an chak