Catalan derby khel tur Barcelona

Zanin dar 1:30-ah Catalan derby khelh a ni dawn a, La Liga hmahruaitu Barcelona chuan Krismas chawlh an hman hnua an match hmasa berah Espanyol an lenchilh ang. 

Barcelona hian Krismas hmaa an match hnuhnung berah Alaves chu nuamsa takin 4-1 in an sawp a, La Liga table chung berah point hniha sang falin hma an hruai mek. Catalan club hi Real Madrid nen point hmuh zat inanga inum chho reng an ni a, mahse Real Madrid hian Krismas hmaa an match hnuhnung berah Athletic Bilbao chu an inhnehtawkpui. 

Real tlawm avangin point hnihin Barca an san phah a, Real hian zanin dar 8:30-ah Getafe an lenchilh ve dawn bawk - Barca um zel turin an tan chak a pawimawh. 

Tun season-a beisei phak lo Espanyol hian Krismas ruai ṭheh zawh hnu, December 27-ah khan coach thar atana Abelardo Fernandez an lakluh thu an puang a, Barca chuan an hmelma club tih el nan an hmang zui. 

Kum 49 mi coach hi player a nih laia Barcelona tana khel ṭhin a ni a, Barca hian social media lamah Abelardo hi an player hlui a nih thu an pholang!

Espanyol an awm mai mai bik lo - Barca coach Ernesto Valverde hi player a nih laia an tana lo khel ve tawh tho a ni a, Espanyol tana a match khelh zat leh goal khung zat an pholang ve zui zat. Club inhal tak pahniha coach-te hi an hmachhawn tur club tana khel tawh ve ve an ni a, intihel nana club pahnihin an hmang hian inkhel boruak san turzia a hrilhfiah. 

Barcelona-in beisei anga season bul an ṭan lo chungin Real Madrid leh Atletico Madrid ten beisei an phak bik loh miau avangin table chung ber an luah a, Espanyol erawh 20-na niin a mawngphah an luah. Coach thar Abelardo hnuaia an match hmasa berah Barca an hmachhawn nghal dawn a, chak nena bul ṭan hi Espanyol ṭantute zawng zawng duhthusam a ni ang. 

Mahse, Espanyol tana chanchin lawmawm loh chu tawnhriat nei ṭha midfielder Esteban Granero hrem vanga a inlan thei lo tur hi a ni a, Barca tan goalkeeper Marc-Andre ter Stegen inlan a rinawm bik loh. Hetihlai hian Lionel Messi, Luis Suarez leh Antoine Griezmann te an dam ṭha vek a, "Kumthar Chibai," tia an fan-te lawmna thlen turin tlarhma pathum hian goal khung an duh vek ang. 

Zanin dar 8:30-ah Real Madrid-in Getafe an lenchilh dawn a, chak loh a thiang lo - hetiang boruak karah hian hrem vangin captain Sergio Ramos a inlan thei dawn lo thung. Marcelo chu hliam vangin a inlan thei dawn lo bawk a, Porto aṭanga an lakluh, beisei anga hmun la chang rih lo Eder Militao tan bul ṭanna remchang a ni thei thung. 

Eden Hazard leh Marco Asensio te an la inlan thei lo chhunzawm zel dawn a, Lucas Vazquez leh James Rodriguez ten club training zawm tawh mah se an inlan theih a la rinawm 

chiah lo. Hetihlai hian Madrid khaw club tho Atletico Madrid chu zanin dar 11:00 hian an inlan dawn bawk a, Levante an mikhual ang - Atletico hian Krismas hmaa an match hnuhnung berah Real Betis chu 2-1 in an hneh.