Minute riat chiah an mamawh

Germany-in FIFA Confederations Cup final an khel dawn tih hre turin minute riat chiah an mamawh a, hun a tawp meuh chuan Mexico lakah 4-1 in an chak. Ningani zan inkhelah Die Mannschaft tan Leon Goretzka-a'n minute riat chhungin goal hnih a khung nghal a, Mexico tan thawhchhuah ngaihna a awm tawh lo.

Joachim Low hoten Timo Werner hmangin minute 59-naah goal thumna an khung a, Mexico midfielder Marco Fabian-a'n minute 89-naah yard 35 aṭanga kawh zeta a pet goal chu mualpho lutuk tur hliah khuhna chauh niin 2014 FIFA World Cup champion-in Amin Younes hmangin goal lina an khung.

Mexico an vanduai!

Semifinal ṭan phatah Schalke midfielder Goretzka class san zia a lang a, chumi rual chiah chuan Mexico tlarhnung a phui tawk lo tih a hmuh theih bawk. Goal hnih an chhuah hnuah El Tri-in insiamṭhat an tum a, an mamawh ber goal an khung thei lo.

Mexico hian vawi 26 zet shot an nei a, 2-0 a nih laiin Giovani dos Santos goal khung tur chu German keeper Marc-Andre ter Stegen-a'n a dan sak a, Javier Hernandez-a'n yard ruk lek aṭangin a khung lo a, Hector Herrera leh Raul Jimenez ten Barcelona keeper tan hna an siam sak bawk.

Germany-in Werner hmanga goal thumna an khung hnuah pawh Mexico an la beidawng lo a, minute 89-naa Marco Fabian goal khung chu hriat reng tlak khawpa ropui ni mah se result a thlak danglam loh avangin a hlu tawk lo.

Vawi 26 zet goal khung tuma shot nei Mexico hian tlarhma hriam lamah Germany an pha lo a, World champion hian vawi 12 an pet aṭangin goal li an khung thung.

Eng nge an sawi?

Mexico coach Juan Carlos Osorio chuan, "Hei aia result ṭha hi kan phu a ni. An theihna a sang sia a, chumi lantir theihna hun leh hmun kan pe kha kan tuar a ni. Eng pawh chu ni se goal hnih khat dang chu khung belh kan phu a ni," tiin mawi hnai zawka chak thei an nih thu a sawi.

Germany boss Joachim Low chuan, "Inkhelh hma­a kan khelh dan tur kan zir hona kan hmang ṭang­kai a, kan game plan anga an khel chhuak thei kha a pawimawhin a lawmawm hle a ni. Chutihrualin inkhelh hmaa kan zir chu eng pawh ni se a pawimawh ber chu inkhelh laia thil thleng kha a ni a, ka naute thawhrah a ni a, fak an phu a ni," tiin a lungawi hle.