Wenger thlawp ang u - Gazidis

Arsenal chief executive Ivan Gazidis chuan fan-te chu an manager Arsene Wenger thlawp tlat turin a ngen a, player ṭha an lakluh tur thu a sawi tel bawk.

Kum 67-a upa Wenger hi chhuak tura duhtute thawm ring tawh hle mah se May thla khan kum hnih daih contract a ziak thar a, a hnu lawkah Gunners-in Premier League nomawi an chawi theih a beisei thu a sawi bawk.

Season hmasa khan Arsenal hian FA Cup nomawi an chawi a, league lamah erawh pangana an nih avangin Champions League an khel phak dawn lo - Wenger-a'n a vawi khat nan Europa League-ah a naute a inlan pui dawn a ni.

Kum 2009 aṭanga Arsenal chief executive ni tawh Gazidis chuan, "Board lam chuan inlungrual loh­na awm hi a hmuh hmaih lo, chutihrualin inpumkhatna kan duh a, hma kan sawn theih nan kan manager hi thlawp vek turin fans ka sawm," tiin league nomawi vawi thum chawi pui tawhtu manager thlawp turin fans a ngen.

Manager contract thar chung­chang sawi zuiin Gazidis chuan, "Thutlukna siamtu ber ka ni lo, kei chu roreltute zinga pakhat ve mai ka ni. He club hian hmasawn zelin khawvela a ṭha berte zinga mi ni turin kan duh, chutiang tur chuan hma kan la a ni," tiin Wenger chungah rinna an la nghah ngam thu a sawi.

Tun nipui chhungin London Hmar veng club hian Schalke left back Sead Kolasinac chu free transfer-in an lalut tawh a, tun hnaiah striker Alexandre Lacazette lakluh an tumna erawh French Ligue 1 club lamin an hnawl sak rih thung.

Gazidis chuan sawi chhun­zawmin, "Kum li liam ta ai khan player zawngtu lam pawh a let thuma tam kan nei tawh a, tunah hian top player zawngin an mit an len mek a ni," a ti. Gazidis thusawi ang a nih chuan Arsenal hian player naran ni loin chakpui tham player lakluh an tum niin a lang.