I League leh ISL a rualin khel dawn?

Ningani khan I League club aiawh leh All India Football Federation (AIFF) hruaitute an ṭhukhawm a, season thar atan I League leh Indian Super League chu a hran ve vein a ruala khelh mai an remti.

He meeting hi AIFF lam aṭangin League Committee chairman Subrata Dutta, AIFF general secretary Kushal Das leh I League CEO Sunando Dhar te chuan an chhim a, club leh AIFF lam hian inremna nei mah se an thu pass te hi July 5-a ṭhukhawm tur League Committee lamah pawm turin an thlen leh phawt dawn a ni.

Inremna chu

I League leh AIFF hotute inremna ang chuan 2017-18 season league chu I League leh Indian Super League ten a hran ve vein an khel phawt ang a, tun hma anga inkhelh chhawk ang erawh kha chuan a ni tawh dawn lo. Chumi awmzia chu player tan khelhna tur club a tam sawt dawn tihna a ni a, tuna a kal ang hian I League leh ISL a khelh kawp theih tawh lo ang.

India rama league pahnihte a ruala kalrual tir tura thutlukna hi League Committee lamin lo pawm pawh nise hetianga kal reng tur tihna erawh a ni lo, season khat atan 'tuna buaina' chinfel nan enchhin a ni phawt dawn tihna a ni.

Club ngenna

I League club-ten AIFF lam­ah an duh an thlen nual a, chung zinga langsar tak pa­khat chu I league 2017-18 chu Star network-ah Indian Super League anga pekchhuah ve a ni. Hei mai hi a ni lo, I League chu miten an ngaihven theih nan marketing campaign neih sak turin an ti a, professional pro­motion campaign an beisei bawk.

India rama league sang ber inelna club te hian AIFF chu I League club te telna Task Force din turin an dil bawk a, anni hian regular takin I League thlirletna an nei ṭhin ang. I League club te an zinchhuah apiangin an senso atan cheng nuai nga pek ṭhin an ni a, hei hi nuai 10-a tihsan turin an dil bawk.

Foreigner an pung

Tun dinhmunah I League club ten ram pawn player pali an chhawr thei a, an zinga pakhat hi Asia huam chhunga mi a nih a ngai thung. I League club te chuan season thar aṭanga foreign player pariat neih thei an dil a, an dilna ang chuan an zinga pahnih hi Asia huam chhunga mi an ni ang. Starting eleven-ah foreign player panga an awm thei ang a, an zinga pakhat chu Asia mi a nih a ngai thung dawn.

He rawtna hi I League club zawng zawng erawhin an pawm thei lo a, Minerva Punjab neitu Ranjit Bajaj chuan anmahni bakah I League champion Ai­zawl FC, 2nd division cham­pion nichunga I League khel tur NEROCA FC leh Chennai City FC-ten foreigner pariat neih hi an thlawp loh thu a sawi.

AIFF thu chhuak

I League club ten season khat chhung atan ISL nen a ruala a hran ve ve a league khelh an duh a, he an duhna ang hi Asian Football Confederation chuan AIFF hnenah tih theih a nih tur thu an lo hrilh tawh a, khawvel huapa football thuneitu sang ber FIFA chuan a lo pawmpui tawh bawk.

AIFF general secretary Kushal Das chuan, "Indian football-in hma a sawn zel hi keini chuan kan duh ber chu a ni mai a, hma kan sawn zel theih nan theihtawp kan chhuah chhunzawm zel ang. Kan ram football tana ṭha ber tur ngaihtuah chhuak tur hian AFC mai bakah Indian football tana an sum sengtute nen kan thawkho chhunzawm zel dawn a ni," a ti.

A chiang lo

I League club-in AIFF hotute nen an indawrnaah an duh hrang hrang an thlen a, heng an thu thlente hi AIFF hian a pawmpui vek tihna a la ni lo. Ningania in­hmuhkhawm hi AIFF-in I League club ten an duh zawng an sawi ve theihna remchang a siamsakna ang chauh a ni a, thutlukna tak chu League Com­mittee-in an la siam leh tur a ni.

Chumi awmzia chu Ninga­nia AIFF hnena I League club-ten thu an thlen hi League Committee-ah chhawpchhuah turin AIFF hian a pawm ve chauh tihna a ni - July 5-a League Committee an ṭhut­khawm hunah engkim a chiang ang. League Committee-ah hian Mizoram Football Asso­ciation honorary secretary Lal­nghinglova Hmar chu deputy chairman a ni mek.