Bournemouth player manto ber Ake

Premier League club Bournemouth chuan cham­pion lai Chesea aṭangin defender Nathan Ake an lalut. Kum 22 mi Ake man zat hi pound maktaduai 20 niin Cher­ries player manto ber a ni.

Netherlands international hian season hmasa khan Blues aṭangin Bournemouth hi loan hmangin a zawm a, match 12 a khelhah goal thum khungin Chelsea hian an ko let a, mah se Antonio Conte hnuaiah vawi hnih bak inlanna hun a nei chuang lo.

Kum 2012-a Chelsea zawm­tu Ake hian season thar­ah Stamford Bridge-ah khelhna hmun a chan a bei­sei­awm loh a, amah duhtu Bournemouth manager Eddie Howe-a'n a team-ah a senglut hreh lo. Pound maktaduai 15 man Jordon Ibe khumin an club record thar a siam hial.

Feyenoord player hlui Ake chuan, "Season hmasa khan he hmunah hian hun nuam tak ka hmang tawh a, fan-ten ka ṭhatna vawr­tawp an la hmu lo. Tunah chuan rilru nghet tak chungin ka inkhel thei dawn a, tunhma zawng aia player ṭha nih ka tum ang," tiin a sawi.

Bournemouth manager Eddie Howe pawhin, "Nathan hian kum naupangte ni chungin theihna a nei sang em em, hmabak eng tak a nei bawk. Kan hnena hun rei tak awm tura contract a ziak thei hi kan lawm hle," tiin a sawi ve bawk.