Record siam tum Federer a inpeih

Roger Federer chuan July 3 aṭanga khelh tur Wimbledon khel tura a inpeih thu a sawi a, champion hnem ber record thar siam chu a thil tum zinga pakhat a nih thu a sawi tel bawk.

Swiss star Federer hian kumina Grand Slam hmasa ber Australian Open final-ah Rafael Nadal hnehin nomawi a chawi a, vawi khat a champion tawhna French Open-ah erawh a inlan lo. Clay court season a hman ve loh chhan hi grass-a result ṭha neih a duh vang a ni.

Kum 35 mi Federer chuan, "Ka thil tum chu a la pangngai reng, ka rilru leh taksa a inpeih a, inkhelh hun ka nghakhlel tawh hle. Clay court ka khelh loh avangin chawlkar 10 chhung vel zet chawlh ka nei a, a chhan bulpui ber chu grass-a hlawhtlin leh ka duh vang a ni," a ti.

Grand Slam vawi 18 champion tawh Federer hian Wimbledon nomawi vawi sarih a chawi tawh a, he hmun­ah bik hi chuan Pete Sampras nen an record a intluk - Federer hian record thar siam turin hun ṭha a nei mek.

Rinkai bik a nih lo thu sawiin Federer chuan, "Tun dinhmunah hian player ṭha tak tak an tam a, tumah rinkai bik a awm theih loh. Sulhnu neih sa a chhawm theih loh a, inelna hi a thar zela neih a nih avangin a khel ṭha ber an champion ang," tiin a sawi.