Bournemouth-ah Jermain Defoe a lut

Sunderland striker Jermain Defoe chuan free transfer-in Bournemouth a zawm a, Cherries tan hian kum thum chhung khel turin contract a ziak. Defoe hian 2000-01 season kha West Ham aṭangin Bournemouth-ah hian loan-in a hun a lo hmang tawh a, match 10 ngawt chu a zawnin goal a khung sak.

Kum 34-a upa striker chuan, "He hmuna ka lo kir leh thei ta hi ka lawm takzet a ni. Team ṭha tak, manager ṭha tak enkawlna hnuaia khel zawm tur hian thutlukna siam a harsa lo. Fan-te hnena ka tiam theih chu goal tam tak a ni," a ti a, season hman zawh taka Black Cats tana league goal 15 khungtu lakah Cherries fan-te beiseina a sang ang.

Defoe hian Tottenham Hotspur, Portsmouth, West Ham leh Charlton Athletic tan Prtemier League-ah a lo khel tawh a, league match 468-a inlanah goal 158 khungin Premier League a goal khung hnem lamah pasarihna a ni.

Cherries manager Eddie Howe chuan, "Tun hi kan club tan club tan chuan hun duhawm tak a ni," tiin Defoe an lalut thei chu a lawm thu a sawi. English striker hian January 2015 khan MLS-ah Toronto tana a khelh hnuin Sunderland a zawm a, a season hmasa berah goal 15 khungin relegation zone aṭangin a chhanhim.

Black Cats-in kum 2019 thleng cham turin contract thar an ziahpui a, mahse division hniam lamah an tla a nih chuan a chhuak thei ang, tih chu a contract-a a tel avangin Stadium of Light hi a chhuahsan ta a ni.

Defoe hian kum 2004 khan England tan a match hmasa ber khelin 2014 World Cup-ah pawh khan a inlan a, mahse 2013-17 inkarah ram tana inlan tura koh a nih loh reng hnuin tun hnaiah Gareth Southgate chuan England tana inlan turin a ko kir a, March khan World Cup qualifier-a Lithuania nen an inkhelah ram tana a goal 20-na a khung.

Premier League-a pakuana nichunga season khar Cherries hian Defoe hma hian Chelsea goalkeeper Asmir Begovic chu an lo lalut tawh bawk.