Srikanth-a sang zel

Indian shuttler Ki­dam­bi Srikanth-a'n court chhungah result ṭha a neih avangin world ran­king lamah pawh hma a sawn zel. Badminton World Federation (BWF) chhuak thar berah point 58,583 hmuin pariatna a ni.

Kum 24 mi Srikanth hian tun hmain number 3 dinhmun a luah tawh, mahse hliam avanga a chawlh ngun bakah duhthusama ṭha result a neih loh rei avangin 22-naah a tla hniam hman. Tun hnaiah rawn che ṭha chho lehin Indonesia leh Australian Open Super Series a chawi zawn a, hei hian dinhmun duhawm tak­ah a hlangkai leh ta a ni.

Andhra Pradesh chief Minister N Chandrababu Naidu chuan Indonesia leh Australia-a a hlawhtlinna avangin Srikanth hi cheng nuai 50 an pek bakah Group 1 officer nihna a pe a, tun dinhmun a thlen theih nana amah chher hriamtu coach Pullela Gopichand pawh cheng nuai 15 pek a ni bawk.

India player dang B Praneeth chu number 15 niin a hnuai chiahah Ajay Jayaram a awm, H.S. Prannoy pawh 23-naah a awm bawk. Hmeichhe lamah Rio Olympic silver medalist P.V. Sindhu chu pangana niin Saina Nehwal erawh 15-naah a tla hniam thung a ni.