Player ṭhenkhat an inlan lo ang - Kvitova
Wimbledon vawi hnih champion tawh Petra Kvitova chuan US Open a khel dawn em tih a sawi chiang thei lo a, kalphung an thlak danglam a nih loh chuan player ṭhenkhat chu an inlan a rin bik loh thu a sawi bawk.
US Open hi August 31 aṭangin New York khawpuiah khelh a ni dawn, a hmuna entu an awm dawn lo. United States Tennis Association (USATA) chuan inkaihhruaina dan khirh tak an siam thar a, dan ṭhenkhat chu zawm harsa a ni.
Inelna hmachhawn turte chu US an pan hma leh thlen hnuah Covid-19 an kai em tih uluk taka endik an ni dawn, hmun hran hrana thleng darh loin hlawm khata dah tum an ni; player ten court-ah mi pakhat bak an hruai thei dawn lo.
Kvitova chuan, "Tuna an ruahmanna ang hi an kaltlangpui a nih chuan player ṭhenkhat chu an inlan dawn lo tih ka hre mai, kei ngei pawhin inkhel turin New York ka pan dawn em tih ka sawi chiang thei rih lo," a ti.
US hi khawvel ram hrang hrang zingah coronavirus kai tam berna hmun a ni a, nitin hri kai thar hi sing chuang hmuh chhuah thar an la awm zel. Tuna a lan dan chuan August thla tawpah pawh hri hi a la hluar hle tura ngaih a ni hial.
US Open mipa singles champion lai Rafael Nadal chuan French Open nen a inhnaih chilh dawn em avangin a dinhmun a chian loh thu a sawi tawh a, world number 1 Novak Djokovic pawhin inkaihhruaina dan khirh tak avangin a hma hun a chian loh thu a sawi ve tawh bawk.