UEFA Super Cup: Real Madrid an thiam zawk

European football season bul ṭanna, Champions League leh Europa League champion-in an khelh ṭhin UEFA Super Cup chu Nilaini zan khan khelh a ni a, Real Madrid chuan 2-0 in Eintracht Frankfurt an hneh.

Champions League nomawi kawltu Real tan David Alaba leh Karim Benzema ten goal khat ve ve an khung a, Europa League champion Frankfurt-in a chhanletna tur an nei lo.

Real Madrid tan UEFA Super Cup-a vawi nga an champion-na a ni ta a, European football sawi a nih chuan rei tak chhung chu Real hming hi lam hmasakah neih a ni zel tawh ang.

Carlo Ancelotti enkawl Real hian August 14, Pathianni zanah tun season-a an league match hmasa ber an khel zui dawn a, khualmualah Almeria an lenchilh dawn a ni.

Real an thiam
Helsinki, Finland-a inkhelah Ancelotti-a'n Champions League final-a Liverpool an hneh ṭuma first XI ngai tho a ring nawn a, 1960 European Cup final-a 7-3 a Real an ngam loh hnua a vawi khat nana Madrid khaw club tawng lehtu Frankfurt tan an ṭha hret.

German club tan hian Japanese striker Daichi Kamada chuan chance duhawm nei nghal mah se, Thibaut Courtois chauh a hmachhawn chungin goal-ah a chantir thei lo a, Frankfurt tan Real laka chance neih goal-a chantir loh hi a pawi thui.

Spanish champion ni bawk team hian Vinícius Júnior leh Benzema hmangin an nawr let nghal a, Brazilian defender Tuta-a'n goalline aṭanga Vinícius chance neih a lo dante chu pui tak a ni.

Brazilian forward Vinicius hian chance duhawm dang a nei bawk a, mahse, Frankfurt goalkeeper Kevin Trapp chuan a kut hmawrin a dansak a, mahse, German club hi an him rei chuang lo.

A goal ta
Trapp-a ball dan per aṭangin Real-in corner an hmu a, he corner aṭanga ball kal chu Alaba chuan hnai set sawt aṭangin goal-ah a lo chantir a, Bayern Munich defender hluiin goal a khung hian minute 37-na a ni.

Benzema-a'n half volley hmangin chance nei ve leh mah se goal-ah erawh a chantir thei lo a, dan reng theih erawh a ni bik lo - minute 65-naah Benzema hian Vinícius siamsak aṭangin an goal hnihna a khung a, chak tur a chiang tawh.

French striker goal khung hma hian Casemiro chuan bar a pet per bawk a, chak an phu - Real boss Ancelotti-a'n tun season-a an telna tur inelna parukah an champion vek theih thu a sawi a, Frankfurt laka an khelh danin chu chu a nemnghet.

Italian manager hian nipui transfer-a a lakluh Antonio Rudiger leh Aurelien Tchouameni-te chu minute 85-naah bench aṭangin a luhtir a, an danglamna lantir turin khelmualah hun an hmang tam tawk lo.

Fak tlak Benzema
Kum 34 mi Benzema-a'n goal hmangin season bul a ṭan a, Real tan match 606-a goal 324 a khungna chiah a ni - Real tana goal khung tam lamah club legend Raúl chu lehpelin, Cristiano Ronaldo chiah a phak tawh lo.

Ronaldo hian Real tan goal 450 a khung a, Manchester United striker record khum tur chuan Benzema hian a nghah hret a la ngai dawn niin a lang.

Chutihrual chuan season hmasa lawkah pawh Benzema hian match 46-ah goal 44 a khung thei a, hetiang renga a 'form' chuan Ronaldo record hi him anga sawi a rem lo.

Real boss Ancelotti chuan, "Benzema hi player pawimawh tak a ni a, kan hruaitu a ni. Super Cup kan khelh theih chhan pakhat pawh amah a ni a, goal a khung hnem em em a ni," a ti a, season hman zawh takah khan Real hi La Liga leh Champions League-ah nomawi a chawipui.

Ballon d'Or?
Benzema hi Ballon d'Or dawng tura sawi rik a ni reng ṭhin a, UEFA Super Cup-ah goal a khung leh tak bawk avangin a hming a ri ring lehzual - a awm lo hran lo.

France Football-in an sem ṭhin Ballon d'Or nominee hi vawiinah puan tur a ni a, khawvela footballer ṭha ber thlanna award hi October-ah semchhuah tur a ni.

Kum dang ang lo takin kum khata che ṭha ni loin season khata che ṭhain he award hi an dawng dawn a, chumi awmzia chu kumina chawimawina dawng tur chu 2021-22 season-a che ṭha aṭangin thlan tur a ni ang.

Ancelotti chuan, "Ballon d'Or dawng turah inhnialna tur a awm lo a, Karim a ni tur a ni. Kan tan chuan khawvela player pawimawh leh ṭangkai ber a ni," a ti a, an result sawi tel nghalin, "Ka naute hi an khel ho ṭhang a, nuam ti takin an khel. Game inman tur chuan a hun taka thil tih zel hi a ni mai," a ti a, a naute a chhuang hle.