Sanchez-a'n Marseille a zawm

Alexis Sanchez chuan season hnih cham turin Marseille a zawm. Inter Milan nen inhriatthiam tawnnain a contract tihtawp a ni a, hei vang hian man nei loin French Ligue 1 club hi a zawm theih phah a ni.

Chile international forward hi kum 33 mi a ni tawh, hliamin a tlak buak fo avangin Manchester United aṭanga Inter Milan a zawm hnuah beisei a phak chiah lo. Serie A club tan hian inelna hrang hrangah match 109 aṭangin goal 20 chu a khungsak tho.

Arsenal hmatawng hlui hian Inter Milan tana a hnathawh erawh hriatreng a ni tawh dawn. 2020-21 season khan goal sarih khungin Serie A champion a nih pui a, kum 11 hnua league nomawi an chawi lehna hmasa ber a nih avangin an ngaihlu hle.

Italian club tan contract nei la ni mah se, club lamin chhawr zui an tum vak loh bakah inkhelh tam theihna tur hmun pan a duh. Hei vang hian inhrethiam tawn takin contract an titawp, tunah chuan chona thar a hmachhawn ang.

Chile tana match 143 khel tawhtu Sanchez chuan, "Marseille fans lamin an beisei ang tih hlawhtlin theih ka inring. Ka nunah hian chona tam tak ka lo hmachhawn tawh ṭhin, tun ṭuma mi pawh hi hlenchhuah ngei ka tum dawn," tiin a sawi.

Marseille hmain Udinese, Barcelona, Arsenal, Manchester United leh Inter tan a khel tawh a, tunah chuan European club paruk tan a khel tling dawn tihna a ni a, nomawi chi hrang hrang pawh a chawi hnem tawhin tawnhriat a nei ṭha.

Marseille president Pablo Longoria chuan, "Sanchez hi tlarhma lamah chuan khawi hmunah pawh khel thei a ni, hei vang hian coach Igor Tudor tan pawh player ṭangkai tak a ni ngei ang," a ti a, tun nipui bazar chhunga Marseille-in player an lak thar pakuana a ni.

Tun season Ligue 1 an match hmasa berah Marseille hian Reims chu 4-1 in an hneh. August 14, Pathianni zanlaiah Brest nen an inhmachhawn zui leh nghal ang.