Number 1 hnehtu Nick Kyrgios

Nick Kyrgios hian tennis khel turin theihna a nei sang, nungchang pangngai tak nena a khelh hi chuan a ṭha berte zinga mi pawh a hneh thei. Australian tlangval hian nimin zing khan ATP Montreal Masters-ah world number 1 Daniil Medvedev a hneh.

Centre Court-a inkhelah Kyrgios hian set hmasa ber chu tie break hmangin a hloh, mahse a hnuhnung pahnihah tho chhuakin 6-7 (1-7), 6-4, 6-2 in a chungnung zawkah a ṭang, a match lehpekah chuan Beatriz Haddad a tum leh dawn a ni.

Tun hma pawhin Kyrgios-a'n chanchin ngaihnawm a nei fo tawh, 2014 khan Wimbledon-ah rin loh tak maiin Rafael Nadal a lo hneh tawh bawk - world number 1 an nih laiin player pahnih a hneh tawh tihna a ni a, a sulhnu a chhe lo.

Kyrgios hi tun hnaiah a khel ṭha. Wimbledon-ah khan final a lut hial a, nomawi inchuhna inkhelah Novak Djokovic a ngam lo thung. Kar hmasa lawk khan Citi Open-ah nomawi a chawi hial a, tunah champion tura rinkai ber a hneh leh ta.

Kum 27 mi Kyrgios chuan, "Ka khingpui turte ranking ka ngaihtuah ngai lo, ka hmaah tunge ding tih chauh ka ngaihtuah zawk. Medvedev hneh tur khan ruahmanna fel tak ka nei, service ṭha leh forehand ṭha a ngai tih ka hria, chumi chu ka tihlawhtling thei a ni," tiin a sawi.

A match khelh hnuhnung 15 zinga 14 zetah hnehna a chang thei a, season kal lai bikah match 27 chak tawhin ṭum sarih chu a chak lo zawkah a ṭang thung. Medvedev pawh kuminah ṭum 11 zet a tlawm tling ta, a tan season ṭha a ni lem lo.

Inkhel dangah Carlos Alcaraz chuan chak theihna remchang a hmuh chu a bawhpelh, match point a hmuh tawh a chhawr ṭangkai theih loh avangin world number 34 Tommy Paul lakah 6-7 (4-7), 7-6 (9-7), 6-3 in a tlawm.

Paul-a hian a match lehpekah chuan Marin Cilic a tum ang. Casper Ruud pawhin Roberto Bautista Agut hmachhawn thei turin Alex Molcan chu 7-6 (7-3), 6-3 in a hneh a, seeded pasarihna Jannik Sinner chuan Adrian Mannarino 2-6, 6-4, 6-2 in a hneh ve bawk a ni.