Hma hun atan Vettel hmanhmawh lo

Sebastian Vettel chuan a hma hun tichiang turin a hmanhmawh loh thu a sawi. German driver hi tun season bak chu Ferrari nen an thawkdun dawn lo, tunah chuan Racing Point nen sawi zawm mek an ni.

Vettel hma hun tur hi an inrinsiak nasa hle. German rama chanchinbu lian Bild-in a tarlan dan chuan Racing Point boss Lawrence Stroll chuan Vettel hi an hnena kal turin a duh a, 2021 season atan contract an zawrh mek niin an sawi.

F1 champion vawi li lo ni tawh Vettel chuan, "Engkim mai hi a la inhawng zau em em vek, ka kawng zawh tur tichiang turin ka hmanhmawh lem lo. Eng nge lo thleng dawn chu hre lo mah ila ka tana ṭha tur ber chu a lo lang mai ang.

"Hma hun ngaihtuah avanga indawm kun mai ka tum lo, tunah chuan engthawl leh nuamti takin intlansiak hmachhawn mai hi ka tih theih leh duh chu a ni," a ti. Ferrari-in hnawl mah se team zawm tur thlan chungchangah a buai lo a nih hmel.

Formula 1 season hi Covid-19 vangin an ṭan tlai a, kum dang ang chu ni se inelna bosruak san vanglai a ni tawh ang - kuminah erawh intlansiak pathum chauh an la hmachhawn. Pathianni zan dar 6:40 hian inelna pathumna atan Hungarian Grand Prix an tlan ang. Intlansiak hnuhnung pahnihah Mercedes an chungnung a, Ferrari driver-te erawh inbakkaih palhin an tlan tluan thei lo. Team champion lai Mercedes el phak tur chuan insiamṭhat an ngai hle.