Brentford-ah Denmark winger

Premier League club Brentford chuan Denmark winger Mikkel Damsgaard chu Sampdoria aṭangin an lalut. Damsgaard man zat hi tarlan a ni lo a, a contract rei zawng erawh kum nga chhung atan tih a ni thung.

Kum 22 mi Damsgaard hian 2020 July thla khan Serie A club Sampdoria hi a zawm. Euro 2020 semifinal-ah khan England lakah freekick mawi zetin a chhuih lut a, an ram hi extra time-ah 2-1 in chak lo mah se a goal hian hriat reng a hlawh.

Brentford manager Thomas Frank chuan, "Mikkel hi kan tan chuan player ṭangkai leh pawimawh tak a ni ngei ang. Hliam vangin buaina leh harsatna neuh neuh a nei a, amaherawhchu tunah dam tawhin a theihna sang tak hi kan tan a hmang ngei ang.

"Player thawkrim leh huaisen a ni a, a mizia hi ka hriat chian tawhsa niin khelmual chhung mai bakah pawn lamah pawh midang tan a ṭangkai dawn. Hmasawn duh mi a nihna hi Brentford nen a inmil hle a ni," tiin a sawi.

Denmark tan Damsgaard hian match 16 a khelh aṭangin goal li a khung a, season hmasa kha hliam vangin a chawl rei - Sampdoria tan match 11-ah chauh a inlan thei a, tun season-ah chona thar a hmachhawn ang.

Damsgaard hmain Brentford hian tun nipui chhungin - Ben Mee, Aaron Hickey, Keane Lewis-Potter leh Thomas Strakosha te an lalut tawh bawk a, bazarna hun a la awm avangin midang pawh an lak belh mai thei.