Blues defender Saar a chhuak

Chelsea defender Malang Sarr chuan tun season chhung cham turin AS Monaco chu loan hmangin a zawm. A loan hun a zawh hunah Ligue 1 club hian an duh a nih chuan a nghetin an lei thei bawk ang, tiin inremna an siam tel bawk.

French defender hian 2020 August thla khan Ligue 1 club tho Nice aṭangin Chelsea hi a zawm. Stamford Bridge-ah khelhna hmun a chang mai lo, 2020-21 season phei kha chuan intuaihriam turin Porto lamah loan thoin hun a hmang.

Kum 23 mi hian season hmasa khan Blues tan Premier League match 21 a khel a, a tlem vak lo. Mahse, coach Thomas Tuchel-a'n rinrawl atana a hman tur zingah a tel lo, chuvangin Europa League khel tur Monaco lam a pan ta zawk.

Sarr-a chuan, "Ligue 1 hi ka bul ṭanna a ni a, ka hriat bel tawhsa a ni. Ka inkhelh fo tawhna ṭhinah Monaco tana khel tura ka kir thei hi ka lawm, min ring ngamtu club chungah ka lawm. Ka ṭhian tharte nena hnathawh ka chak tawh hle," tiin a sawi.

Tun nipui bazar chhungin Monaco hian player pali an leina chiah a ni. Liverpool striker Takumi Minamino bakah Swiss forward Breel Embolo leh French goalkeeper Thomas Didillon te an lo lalut tawh bawk.