Bencic lakah Serena a chak lo

Serena Williams chuan a chawlh tum thu a sawi hnua a match hmasa berah Belinda Bencic a hneh lo. Nimin zing Canadian Open inkhelah American star hi 6-2, 6-4 in a chak lo a, second round lekah a zinkawng a tawp.

Grand Slam vawi 23 champion tawh Serena chuan, "Tennis bakah thil dang ka rilruah a lut hnem, a lungchhiat thlak zawng pawhin ka ngaihtuah. Ka ngaihdan chuan tun aia ṭha zawk kha chuan khel tur ka ni chiang.

"Mahse, ka khingpui Belinda khan a khel ṭha em em a, kei aia a tih ṭhat zawk miau avangin chak zawk nih kha a phu hlein ka hria," tiin a sawi a, a duhthusam thleng chiah lo mah se a vui lo.

Olympic champion lai Bencic hian hnehna chang turin darkar khat leh minute 18 a mamawh. Swiss nula hian vawi riat aces a siam a, set khatna bikah Serena-i service vawi hnih chhuhsakin, set hnuhnung zawkah ṭum khat a chhuhsak bawk.

Kum 40 Serena hian August 29 aṭanga khelh tur US Open zawh hunah tennis chawlhsan a tum, a tan chuan match a khelh apiang hi a hnuhnung ber a ni nghal zel tawh a, rilru chu a kalding duh khawp ang tih chu a rin theih.

Thla tharah chuan Serena hi kum 41 a tling dawn. Tun ṭumah hian chak lo mah se inkhel entu lamin an ṭan hle a, a chet fuh laiin thawm a ṭha thei lo. Tennis court a chhuahsan dawnah pawh tournament buatsaihtu lamin pangpar nen an thlah hial a ni.

Inkhel dangah Iga Swiatek leh Coco Gauff te erawhin an khingpui ve ve hnehin third round an inhlangkai thung. World number 1 Swiatek hian Ajla Tomljanovic chu 6-1, 6-2 in a hneh a, set hnih an khelh laiin hnufual lai a nei lo.

Grand Slam vawi hnih champion tawh Swiatek hian a match lehpekah chuan Beatriz Haddad Maia a tum ang, hard court bikah Swiatek hi a zawnin match 19 a chak mek a, midang tan hmachhawn a châkawm lo kawp ang.

American tleirawl Gauff chuan inkhel inhnehtawk takah Elena Rybakina chu 6-4, 6-7 (8-10), 7-6 (7-3) in a hneh. Gauff hian Aryna Sabalenka a tum leh dawn, seeded pahnihna Anett Kontaveit erawh Switzerland nula Jil Teichmann lakah 6-4, 6-4 in a chak lo.

Tun season chhunga Grand Slam khelh tur pali zinga pathum - Australian Open, French Open leh Wimbledon te an khel tawh. Major tournament hnuhnung ber atan US Open an la hmabak.