Sindhu hmabak a hautak dawn

Badminton World Federation (BWF) chuan World Championship khelh dan tur phung a tichhuak. India nula chhuanvawr PV Sindhu tan semifinal thleng tur pawhin kawng a hautak dawn hle a ni.

August 22-28 chhung hian Japan khawpui Tokyo-ah World Championship hi neih a ni dawn. Sindhu hian semifinal thleng turin Asian Champion Wang Zhi Yi leh An Se Young te a hneh a ngai dawn.

South Korean tleirawl Young nen vawi nga an inhmachhawn tawh a, an inkhelh tawhnaah Sindhu hian chak ni hmel a la hmu miah lo. Thleng sang tur chuan tun hma lama a la tih theih ngai loh a tih a ngai dawn tihna a ni.

Sindhu bakah hian 2015 silver medalist Saina Nehwal leh world number 48 Malvika Bansod te pawh hmeichhe singles huangah an inlan dawn. An match hmasa berah an chak a nih chuan, world number 1 Akane Yamaguchi leh Commonwealth Games silver medalist Michelle Li te an tum a ngai ang.

Mipa player ṭha pathum te chu an kalkawng a inang dawn. World Championship neih hnuhnung bera bronze medal latu Kidambi Srikanth, Lakshya Sen leh Thomas Cup champion an nihpui H.S. Prannoy te chu final hmain an in tum thei vek.