World Cup match hmasa khelh hun sawn mai thei

Football thuneitu sang ber FIFA chuan World Cup 2022 chungchang a ngaihtuah a, ruahmanna hmasa tidanglamin Qatar World Cup match hmasa ber chu ni khatin a hun an sawn hma mai thei, thutlukna erawh an la siam lo.

Ruahman dan chuan match hmasa ber hi November 21, Thawhṭannia khelh tur a ni. Qatar awmna group A lamin match an khelh hmasak ber tur chu November 21-ah a ni a, tlai dar 3:30-ah Senegal leh Netherlands te an inhmachhawn ang.

A thlengtu Qatar chu November 21 zan dar 9:30-a khel tura tih an ni, hei hi World Cup 2022 atan match pathumna a ni ang. South America khawmualpuia football thuneitu sang CONMEBOL chuan FIFA hnenah Qatar chu match hmasa khelhtir turin an ngen.

Football khawmpui lianah hian a thlengtu ram chuan match hmasa ber an khel tlangpui, hei hi dan siam ni lo mah se kalphung nghet pangngai taka an neih sa a ni. Chuvangin CONMEBOL hian ṭum danga an tih ṭhin dan hi chhawm an duh.

FIFA chuan Qatar leh an khingpui tur Ecuador chu hemi chungchang hi a sawipui, ruahmanna hmasa aia ni khata khel hma turin an ti. Khawmualpui paruka football thuneitu President-te ṭheuh bakah FIFA president Gianni Infantino chuan thutlukna an siam ang.