Austrian GP-ah Marquez lo kir dawn

Tun kar tawpa tlan tur MotoGP Austrian Grand Prix-ah Marc Marquez a hmel kan hmu dawn. Spanish rider hian intlansiak erawh a la hmachhawn thei dawn lo a, tlankawng sir aṭangin a ṭhiante bike khalh lai a lo en dawn a ni.

May thlaa tlan zawh tawh Italian GP hnuah Marquez hi a hliam zai a ni a, tun thlengin inelna a la hmachhawn leh lo. A hliam hi season hmasa lamah pawh a buaipui tawh kha a ni a, kumin chhungin inelna a hmachhawm hman beiseina a sang lem lo.

Honda rider Marquez chuan, "Zawi zawiin hma ka sawn zel. Ka ban ruh pawh a dam ṭha tawh viau chuan ka hria. Enkawl mek ka la ni a, tuna kan inenkawl dan leh thlen chin chu a lawmawm viauin ka hria.

"August thla tawp hian ka hriselna dinhmun endik nawn leh a ni dawn. Chumi hnuah chuan eng tianga hmalak zel tur nge tih chu kan hre chauh ang, tuna a lan dan chuan endikna neih leh hunah result ṭha kan beisei," a ti.

Marquez hi bike intlansiak huangah chuan mi bik a ni a, kum naupang tak ni chungin record hrang hrang a siam hnem hle. Mahse, tun hnai season thum chhung chu hliam vangin a buai ta, tun hma angin a tlan leh thei ang em, tih chu zawhna lian tak a tling.

Kum 29 mi Marquez chuan, "Hun harsa ve tak chu a ni, ni hnih khat mai a ni lo a, thla hnih mai pawh a ni hek lo. Kum hnih chuang harsatna neia han awm meuh chuan taksa mai bakah rilru pawh a nghawng nasa viau.

"Theih chu ni se zai ngaia awm ka duh tawh lo, chuvangin inelna hmachhawn leh tur pawhin ka hmanhmawh duh lo a ni. 100%-a ka dam var hunah ka lo kir leh ang," tiin a sawi.