Hammers-in Vlasic an chhuahtir

West Ham chuan attacking midfielder Nikola Vlasic chu season khat chhung loan-a khel turin Torino an pantir a, Serie A club hian an duh chuan euro maktaduai 15-in a nghetin an lalut zui thei ang.

Croatia international hian season hmasa ṭan dawn khan CSKA Moscow aṭangin Hammers hi pound maktaduai 25.7-in a zawm a, match 31-ah goal khat chiah khungin beisei a phak lo.

West Ham boss David Moyes chuan nipui transfer inkhar hma ngeiin a tlarhma thuam ṭhat a duh a, hemi atan hian a ruahmannaa tel lo player ho chhuahtir a duh.

Vlasic bakah hian Said Benrahma chu Moyes hian chhuahtir a pawi ti lo nia sawi a ni a, Algerian winger hian season hmasa khan Hammers tan match 48 khel mah se tun season-ah erawh Moyes-ah ruahmannaah a tel lo niin a lang.

West Ham hian tun season-a an match hmasa berah Manchester City an hmachhawn a, 2-0 in an tlawm - Benrahma hi bench aṭanga luhtir a ni.