City-in Sergio Gomez an lalut dawn

Manchester City chuan Spain Under-21 international defender Sergio Gomez lalut turin Anderlecht chu inremna an neihpui a, pound maktaduai 11 an pe phawt ang a, a khelh ṭhat dan a zirin a man hi a la pung leh thei ang.

Premier League champion City hian an left back Oleksandr Zinchenko chu Arsenal lakah an chân a, a hmun ruak luah turin Brighton & Hove Albion defender Marc Cucurella chu lakluh tum mah se a manah an inrem thei lo.

Cucurella hian £62.5mtd-in Chelsea a zawm zui a, City-in a tawpah chuan sum sen tlemna tur zawngin Sergio Gomez an lalut ta a ni - first team squad-ah hmun a chang phak nghal lo a nih chuan, City Football Group club Girona-ah loan-in a khel ang.

Barcelona academy chhuak Sergio Gomez hian Barca B team tan a khel hman a, mahse, 2018 khan Borussia Dortmund zawmin match erawh a inlan tam lo a, German club-a a cham lai hian Spanish second division club Huesca-ah loan-in a khel bawk.

June 2021 khan Anderlecht hi a zawm a, City captain hlui Vincent Kompany hnuaiah Belgian club tan hian a khel ṭhin - tunah chuan City player a ni dawn ta.