Africa-in Infantino thlawp dawn

Confederation of African Football president Patrice Motsepe chuan FIFA president Gianni Infantino chu FIFA hruaitu atan an thlan nawn tur thu a sawi a, Swiss-Italian football administrator chungah rinna an la nghat.

Kum 52 mi Infantino hi February 2016 khan a vawi khat nan FIFA President-ah thlan tlin a ni a, June 2019 khan chuhtu awm loa thlan tlin nawn niin, nakkum inthlanah President hi la chuh leh a tum a ni.

Africa khawmualpuia football thuneitu sang ber CAF hian Nilaini khan Tanzania-ah general assembly an nei a, he hunah hian official takin Infantino an thlawp thu hi an puang.

CAF president Motsepe chuan, "African football tana i hnathawh leh inpekna zawng zawng hi executive committee-ah kan sawi a, ram tin aiawh member 54-te chuan nakkuma FIFA President i chuh leh hunah vote vek tur chein lungrual takin kan pawm tlang a ni," a ti.

Motsepe chuan, "Infantino hian African football tana a inpekna leh hmangaihna a lantir nasa hle. Kum liam taah khan ram 30 vel ka tlawh a, Africa ram tina football association President 54 ka hmu bawk. An vaiin kan khawmualpui tana Gianni Infantino hnathawh an fak hle a ni," a ti a, FIFA President chungah an duhsakna lantir let an tum.