Spurs-in defender thar nei dawn

Tottenham Hotspur chuan Udinese defender Destiny Udogie an lalut dawn a, club pahnih an inrem tawh rualin an inlakluh thu erawh puan lawk an tum lo niin khawthlang media-te chuan an tarlang.

Mahse, Italy Under-21 international hian Spurs tan a khel nghal dawn lo a, season khat chu Serie A club Udinese-ah hian loan-in a khel leh phawt dawn a ni.

Kum 19 mi defender hian season hman zawh takah khan Udinese tan league match 35 khelin goal nga a khung a, assist vawi li a nei bawk - hmabak a nei êng hle.

Spurs hian nipui transfer-ah Ivan Perisic, Richarlison, Fraser Forster, Yves Bissouma, Clement Lenglet leh Djed Spence an lalut tawh bawk a, Udogie hi an player lakluh pasarihna a ni.

Antonio Conte kaihhruaina hnuaiah Spurs-in 3-4-3 in an match tam zawk khelh rin a ni a, tun season-a an match hmasa berah Ryan Sessegnon chuan left wing-back hna a thawk a, 4-1 in Southampton an hneh.

Italian left back Udogie hian an ram club Hellas Verona aṭangin a professional zinkawng a zawh ṭan a, season hmasa ṭan dawn khan Udinese hi loan-in a zawm a, season tawpa an inlak ngheh theihna dan an ziak tel.

Juventus leh Inter Milan pawhin Udogie hi an duh nia sawi a ni a, mahse, Spurs sporting director Fabio Paratici leh coach Conte ten lakluh ngei an duh avangin pound maktaduai 17 an theh chhuak ngam a, Italian club dang pahnih hian heti zat sum thehchhuah an inhuam ve loh avangin Spurs-in an chang zui ta a ni.