Kentucky-ah Serena Williams

US Open inbuatsaihna zinga mi hard court inelna Top Seed Open chu Kentucky-ah neih a ni dawn a, world number 1 hlui Serena Williams chuan a inlan tur thu a tichiang.

Kumin February thla khan ram leh ram hmeichhe team hmanga inelna Fed Cup-ah Serena a inlan, a hnu lamah erawh inelna a la hmachhawn leh lo. Hliam vanga a chawlh bakah Covid-19 vangin tournament a awm lo zui a, inkhel loin a awm rei ta hle.

Grand Slam vawi 23 champion tawh Serena chuan, "Inkhel turin ka inpeih, hun rei tak ka chawlh tawh avangin court chhunga luh ka mamawh tawh a ni," a ti. American star hian US Open pawh khelh ngei a tum thu a sawi bawk.

Kum 38 mi Serena hian major title lak hnem lamah Margaret Court-i (24 titles) chauh tluk loh a nei, record ropui nih rual theihna hun nei mah se final a khelh hnuhnung pahnihah a tlawm avangin a la nih rual thei rih lo; an ramah ngei champion chunga nih rual a tum ang.