I Day Football-ah Dream Final

Dindina'n Aizawl FC a chakpui
Aizawl FC leh Chhinga Veng ten inkhel hmuhnawm an lantir a, I Day Football semifinal hnuhnung zawkah hian I League club-in injury time-a substitute Jeremy Laldinpuia goal hmangin 1-0 in hnehna an chang.

Aizawl FC coach Lalrozama Fanai-i'n captain Immanuel HS Lalṭhazuala (right back) chu bench-ah a dah a, Zuala dinpui ṭhin Lalmuanawma (Munez) chuan captain armband hrengin Rohmingthanga nen an inkawp a, an khelh dan thlirin coach Rozama'n thutlukna ṭha tak a siamah a ngaih theih.

A chhan chu AFC hian an match hnuhnung berah FC Venghnuai chu 3-1 in an hneh lo a, mahse, semifinal-ah insiamṭha nghalin, centre back pangngai pahnih an inkawp hmasak berah tun inelnaa a vawi khat nan an clean sheet. Aizawl FC hian midfield-ah K. Lalrinfela (Mafela) leh KC Larchhuakmawia te an inkawptir a, an hmuhnawm viau bawk.

Chutihrualin Lalremruata leh Anand Gurung te enkawl Chhinga Vengin fak an phu a, player langsar an ngah lo chungin awmze neiin football an khel a, player tinin an tihtur an hriat avangin an khel pawh a hmuhnawm hle.

Aizawl FC tan first half-ah MS Dawngliana a hmuhnawm ber a, Dawngtea hian a chance ṭha neih a hlah nasa thung. Second half-ah coach Rozama'n minute 60 thlen hmain player pali a thlak hlawk - Jeremy Laldinpuia, K. Lalhmangaihkima, Jakob Vanlalhlimpuia leh Lalramsanga te a dah lut a, an goal bawh a nat phah hle.

Chhinga Veng keeper RS Lallawmzuala a khel ṭha a, amaherawhchu I Day Football best keeper ni lai Lawma pawhin Chhingcows a chhan thei ta bik lo. Injury time-ah subsitute Dindina'n box pawn chiah aṭangin goal kilah kawh zetin a pet goal a, ruahsur vanga ball a tleng avangin keeper Lawma tan dan ngaihna a awm lo.

Chhinga Veng tan siphurh sutna hun a awm tawh lo a, Aizawl FC 1-0 in an chak. Final-ah I League club-in anmahni ang bawka player ṭha kawl hnem Mizoram Police an hmachhawn dawn a, 'dream final' tia sawi theih a ni ang.

Police an vannei zawk
I Day Football ṭan hmaa team ṭha bera chhal ngam Mizoram Police chu group stage-ah hmahruaitu ni thei lo mah se semifinal-ah team ṭha an nihzia an pholang. Lalbiaksanga Colney hote hian final lut turin FC Venghnuai an hneh.

Nimin Lammual inkhel hmuhnawmah Police leh Venghnuai te hi hun pangngaiah 2-2 in an inhnehtawk a, extra time-ah goal a luh belh lo. Penalty Shootout-ah Police keeper F. Lalmuanawma'n Vanlalthanga leh Thangzawmsanga te pet ṭha taka dansakin 4-2 in hnehna a chanpui.

Police ṭha zawk
Mizoram Police-in group match hnuhnung bera Chanmari an hmachhawn ṭum aṭangin player paruk ngawt an thlak a, coach BS-a'n thutlukna huaisen siamin team-in an ṭhatpui. Inter Village 2022-a hrem tawk Lalnunsanga'n (Talea) a hremna a hmang zo a, bul ṭantu zingah telin minute 19-naah goal hmahruai a khung. Talea hian goal a khung zawh hian amah ringtu coach BS-a bulah kalin lawmthu a hrilh.

Venghnuaiin bul an ṭan ṭha zawk a, amaherawhchu minute 10 hnuah Police an chungnung ta zawk. Coach Lalrindika Hmar tana harsatna belhchhah turin minute 26-na lekah India junior tana khel tawh Eric Remruatpuia Chhangte chu thlak a ngai bawk.

Rindika Hmar-in winger pahnih VL Thanga leh C. Ngurnuntluanga te awmna a thlak thleng a, hei hian rah ṭha a thlen. Minute 45-naah Venghnuai tan Lalrammuanpuia'n goal a khung a, Apuia hian tun inelnaah goal nga khung tawhin top scorer a ni mek.

Second half-ah Police an chungnung zawk a, minute 54-naah R. Malsawmtluanga'n box pawn aṭangin mawi zetin a ke vei lamin goal kilah a dah. Police-in 2-1 a hma an hruai hnuah pawh an khel ṭha zawk a, defender Lalhmunmawia'n (Ahmuntea) ṭha zetin tauh lut mah se goal-ah pawmsak an ni lo!

Venghnuaiin hun tawp thlengin beiseina an neih phah a, halfway line bul aṭangin VL Thanga'n freekick a vawrhlut a, Police keeper Muanawma chesualin goal-ah a lut. Referee thutluknaah Police an lawm lo a, replay thlir erawh chuan thutlukna dik niin a lang.

Penalty chu
Extra time-ah Police substitute Lalfakzuala chu box chhungah tihtluk a ni a, penalty an hmu lo. Venghnuai an ṭang tluang a, penalty hmangin chak zawk zawn a ṭul.

Police keeper Muanawma'n a tihsual siam ṭhat nan a hmasa bera pettu Venghnuai captain VL Thanga penalty pet a dang a, pathumnaa pettu Zawma pet a dang leh bawk. Police tana pettu H. Lalbiakthanga, F. Lalrinpuia (Valpuia), Lalbiakhlua (Hlutea) leh Lalruatpuia ten an khung vek a, 4-2 in hnehna an chang.

Police coach BS-a Colney chuan, "Chak kan phu a, kan khel ṭha zawk. Ka naute khelh danah ka lawm a, final-ah pawh ṭha zawkin kan khel thei ang. Referee chungchangah chuan decision pahnih kha hriatthiam har ka ti a, a bakah chuan a ham ṭha khawp mai," tiin Vanglaini a hrilh. Venghnuai coach Rindika Hmar chuan MPL-ah ṭha zawka an rawn kir tur thu Vanglaini a hrilh ve bawk.