Veteran Football G90's leh Police ten final an lut

Veteran I Day Football-ah team ṭha pahnih Mizoram Police Veteran leh G90's ten final an lut a, nomawi inchuhna hi August 15, Thawhṭanniah khelh a ni ang.

Mizoram Poice hian sulhnu nei ṭha player an ngah a, Ditea's United lakah pawh team ṭha zawk an ni tih an pholang. Police tan taksa invawn ṭhat avanga tun thlenga player chak ṭha pahnih Roliantluanga (goal hnih) leh Lalthanpuia ten goal an khung. Ditea's tan Mizo trio tia hriat ṭhin zinga mi Vanlalrova'n siphurh sut ṭhen mah se result a danglam phah lo.

Semifinal hnuhnung zawkah G90's-in Ari Benjamin LR Hmar leh Lalsangzuala (Valbuanga) te hmangin Chanmari Veteran 2-0 in an hneh. G90's hi kum 1990 chhoa footballer ṭha ho awm khawmna an ni a, player ṭha pawh an ngah. Ari hi Mizo striker ṭha zinga sawi tel ziah a ni ṭhin a, Valbuanga pawh hi midfielder ṭha tak niin Services-ah a hun tam zawk a hmang.

Semifinal
Mizoram Police 3-1 Ditea's United
MRP : Roliantluanga 29', 35+1'; Lalthanpuia 66'
DIT : Vanlalrova 45'

G90's 2 - 0 Chanmari Veteran
G90 : Ari Benjamin L.R. Hmar 17'; Lalsangzuala 59'