Serie A pahnihnaah Inter an kai

Inter Milan chuan Ningani zan khan Spal 4-0 in an luhchhuah a, table-ah pahnihna dinhmun luahin hmahruaitu Juventus an phak lohna chu  point ruk lai a la ni thung; Serie A khelh hmabak match panga an la nei.

Table mawngphah luahtu lakah Antonio Conte nauten zahngaihna an lantir lo. A khat mawi tawkin - Antonio Candreva, Cristiano Biraghi, Alexis Sanchez leh Roberto Gagliardini te chuan goal khat ṭheuh an khung. Inter Milan hian Pathianni zanah AS Roma an lenchilh leh nghal dawn. Roma hi season thara European football khelh beisei lai an ni a, champion tum Inter tan a awlsam dawn lo; an inkhel tawk viauin a rinawm.

Italian manager Conte chuan, "Hmanni khan ngelnghet taka khelh theih a pawimawhzia ka sawi, tunah chuan a chhanna kan hmu ṭanin ka hria. Inpekna, tih takzetna leh huaisenna kan nei let leh tawh. "Chutihrualin awlsam tak erawh chuan hnehna kan chang lo. Inkhel en lo tan chuan nuamsa taka chak kan ang mai thei, a nihna takah chuan point thum hmu tur khan theihtawp tak meuh kan chhuah a ni," a ti.

Season tir lamah Inter Milan an kal fawr a, a laihawlah an zuih. Coronavirus vanga an chawlh hnuah beisei phak lo mah se tun hnaiah an tho chhuak leh a, nomawi hlawh chhuah beisei ngam tawh chiah lo mah se pahnihna chu an kuta awm a ni thung.