Aw nangni, Real thawhlehna nghaktute u... In nghak chhuak ta - La Liga champion chu Real Madrid

Kum hnih zet Real Madrid-in Barcelona nomawi chawi lai an thlir hnuah nomawi an chawi ve leh ta a, nghakhlel taka an ropui leh hun nghak tuten an nghak chhuak ta. 

Real Madrid hian Ningani zan khan Villarreal chu 2-1 in an hneh a, match khat khelh tur la nei mah se um phak theih an nih tawh loh avangin Spanish champion thar an ni. Madrid boss Zinedine Zidane chuan, "La Liga nomawi chawi a hautakzia ka hria a, thil dang zawng aiin league nomawi kan chawi hian min ti hlim a ni," a ti.

Ningani zan La Liga inkhel ngaihven hlawh dangah Barcelona chuan 2-1 in Osasuna an ngam lo thung a, Real hian Villarreal leh an la hmachhawn tur Leganes lo ngam lo ve ve ta pawh ni se an champion dawn tho tihna a ni!

Zidane-a'n Real-a enkawl hmasakah hlawhtlinna tam tak a chhar a, tawnhriat nei tam bik lo a nih avangin, "Cristiano Ronaldo thiamna vang," tiin an sawi a, Ronaldo chhuah hnuah beisei a phak lo bawk. 

Mahse, Real-a a lo kir leh hnuah Zidane-a'n Ronaldo a nei tawh lo. Ronaldo tel lo pawhin Zidane a lo talbuai reng reng lo - Real fan-ten an beisei nomawi a chawi a, tun ṭumah erawh Ronaldo ni loin Karim Benzema leh Sergio Ramos chu innghahna an ni. 

Villarreal lakah pawh Benzema hian goal hmahruai a khung a, an goal hnihna hi penalty aṭangin a khung bawk. Penalty hi Ramos hlawhchhuah a ni a, Real captain hian a pet hmasa. Mahse, tun season-a league goal 10 khung tawh defender hian pet mai loin Benzema tan a 'assist' a, French striker a tlan chhuah hma avangin referee-in a pawm lo. Penalty pet ṭhat a ni a, Benzema-a'n petin a goal chiang hle. 

Villarreal hian Barcelona tana beiseina chhete siamsak turin Vicente Iborra hmangin minute 83-naah an khung ve leh a, mahse si phurh sut zo turin hunin a daih tawh lo. 

La Liga chhunzawm leh a nih khan Barcelona chu hmahruaitu an ni a, Real hian match 27 khelh tawhah point hnihin an phak lo. Mahse, Barca an chesual zui a, Ningani zan inkhel hma khan draw result vawi thum ngawt an nei - Real erawh match kuaah an chak vek thung. 

Ramos chuan, "Season hriatthiam har tak a ni a, mahse league khelh chhunzawm a nih dawn khan kan tumah kan chiang hle. Match zawng zawnga hnehna chan vek kan tum a, kan vaia thawhrim rah chu a lawmman kan tel ta. 

"Zidane hi kan hlawhtlin chhan ber a ni. Kan lawng 'captain' a ni a, season ṭantir aṭanga kan hmahruaitu a ni. Zizou a awm chuan kan thla a muang ṭhin a, coach ṭha tak a ni," tiin Zidane a fak.