FPAI Awards ; Mama leh MFA hnenah chawimawina
India rama footballer intelkhawm pawl Football Players' Association of India (FPAI) chuan kumtina an sem ṭhin FPAI Awards chu RG Stadium, Aizawlah Inrinni khan an sem a, Mizo legend S. Malsawmtluanga leh Mizoram Football Association chu football tana an tha thawh hlawk vangin Special Awards pek an ni.
Mama hnena chawimawina pek a nihlai hian Mizo-te tana professional football zinkawng sialtu zahna lantir nan inkhel entu mipui ten ding chunga kut beng chungin an lawm.
Mizoram XI leh FPAI XI-in exhibition match an khelh chawlh kar lakah awards hi sem a ni a, Aizawl FC coach Khalid Jamil chu Coach of the Year-ah thlan niin captain Alfred Kemah Jaryan chu Foreigner of the Year-ah thlan a ni bawk.
Anas a thiam ber
FPAI Player of the Year chawimawina dawng turin nikuma he chawimawina dawngtu Jeje Lalpekhlua hming chhawpchhuah tel ni mah se Hnahthial tlangval hian Mohun Bagan tana a khelhpui Anas Edathodika a tluk lo a, kum 30-a upa defender hi Indian player ṭha berah puan a ni.
Anas hian he chawimawina dawng tur hian Jeje bakah Bengaluru forward pahnih CK Vineeth leh Sunil Chhetri, Aizawl FC champion-na kawnga thawhhlawk tak Jayesh Rane te a khum.
A vawi hnih nan Udanta
Manipur tlangval Udanta Singh-a'n nikumah Young Player of the Year chawimawina a lo dawng tawh a, kuminah pawh Indian rawlthar zingah Udanta tluk pha an la awm lo. Kum 21-a upa forward hi Bengaluru FC leh India tan player pawimawh a ni.
Tata Football Academy aṭanga a chhuah kuma Best cadet chawimawina lo dawng tawhtu Udanta hian he awards dawng tur hian Mizo rawlthar Jerry Mawihmingthanga, Isaac Vanmalsawma, East Bengal midfielder Nikhil Poojari leh Churchill Brothers midfielder Chesterpoul Lyngdoh te a khum a ni.
Aizawl FC an tê lo
Aizawl FC champion-na kawnga Alfred Jaryan thawhhlawk zia hmuh hmaih theih a ni lo a, Liberian midfielder hi ram pawn player zinga thiam berah thlan a ni. Alfred hian Mohun Bagan winger Sony Norde leh striker Darryl Duffy, East Bengal striker Willis Plaza, Shillong Lajong striker Asser Pierrick Dicka-te a khum.
Coach of the Year dawng tur puan a nih hmain Khalid Jamil chu he chawimawina dawng tur hian beisei sa a ni a, rinlawk ang ngeiin I League-a Aizawl FC champion puitu hi India rama coach ṭha berah puan a ni.
East Bengal coach thar hian Shillong Lajong coach Thangboi Singto, Mohun Bagan coach Sanjoy Sen, East Bengal boss Trevor Morgan leh Churchill Brothers boss Derrick Pereira-te a khum.
Fans duh ber Vineeth
CK Vineeth hi season hman zawh takah Indian zinga Indian Super League leh I League-a goal khung hnem ber a ni a, he ti chung hian Indian Player of the Year a ni lo! Mahse, Kerala tlangval hian fan-te ngainat a hlawh ber avangin Fans Player of the Year-ah thlan a ni.
Fans Player of the Year thlang tur hian FPAI website-ah vote 40,000 chuang a tla a, player 10 chhawpchhuah zingah Vineeth-a'n vote hmu sang berin a khum tak zingah Aizawl FC player Zohmingliana Ralte, Jayesh Rane, Albino Gomes leh Hnahthial rawlthar Isaac Vanmalsawma te an tel.
Mama & MFA
FPAI-in awards an sem apiangin Indian football tana thawhhlawkte hnenah an hnathawh an hriatpui reng a ni tih lantir nan Special Awards an pe ṭhin - Mizo legend S. Malsawmtluanga leh Mizoram Football Association chu he chawimawina hi pek an ni.
MFA hi grassroots aṭanga senior level thlenga Indian football-a an tihṭhat avangin award hi hlan an ni.
Mama leh MFA bakah hian veteran player Deepak Mondal leh Sandip Nandy, Tata Football Academy-a kum 21 chuang Indian footballer-te lo chher tawhtu Ranjan Chowdhury-te chu Special Awards hi pek an ni bawk.
FPAI Awards 2017
Player of the Year Award
Anas Edathodika Mohun Bagan AC/ Delhi Dynamos
Young Player of the Year Award
Udanta Singh Bengaluru FC/ Mumbai City FC
Foreigner of the Year Award
Alfred Jaryan Aizawl FC
Fan's Player of the Year Award
C.K. Vineeth Bengaluru FC/ Kerala Balsters
Coach of the Year Award
Khalid Jamil Aizawl FC
Special Awards
Deepak Mondal, Sandip Nandy, Ranjan Chowdhury, S.Malsawmtluanga, Mizoram Football Association