Hrileng vangin Chinese GP a chiang lo

China rama hri a len avangin nunphung a khaihlak nasa a, infiamna lamah pawh nghawng a nei mek. Coronavirus vang hian Chinese Grand Prix chu ṭhulh thut theih dinhmunah a ding mek.

Shanghai Sports General Association chuan an rama infiamna chi hrang hrangte pawh tiam chin awm loa ṭhulh vek rih turin thuchhuah a siam a, hei hian F1 pawh a huam thei ang. Chinese Grand Prix hi April 19 hian Shanghai khawpuia tlan tura ruahmansa a ni.

Car intlansiakna sang ber F1 hi tun season-ah ruahman dan chuan intlansiak vawi 22 awm tura tih a ni, amaherawhchu tunah chuan hri leng vangin thil a chiri mek. China ramri aṭanga mel 100 vel chauha hla a awm Vietnamese Grand Prix pawh a nghawng thei dawn.

Kuminah a vawi khat nan Vietnamese Grand Prix tlan tum a ni a, tun thleng chuan Vietnam-ah hian coronavirus vanga harsatna nei hi mi 10 bawr chauh an la awm - Chinese GP an tlan lo a nih pawhin Vietnam lamah chuan inelna neih theih a beiseiawm.