MFA Super Cup 2017 MPL club pahnih inlan dawn

Team 63 telna Lalbiakliana Memorial MFA Super Cup 2017 chu vawiin hian Lammual leh Rajiv Gandhi Stadium-ah khelh ṭan a ni dawn. Inelna ṭan ni hian MPL5 finalist Bethlehem Vengthlang FC leh I Day Football 2016 finalist Ramhlun North FC te an inlan nghal ang.

MFA Super Cup-ah hian Last 32 lut pha chinin Rs 2,500 an dawng dawn a, vawiina chak zawng hi chuan an dawng dawn tihna a ni. Inelna fixtures hi July 28 khan pawh a ni a, seeded an awm loh avangin first round aṭangin inkhel hmuh­nawm a kat nuk dawn a ni.

Tualchhung football transfer chu July 31 khan a tawp a, Mizoram pawna khel player leh foreigner erawh lakluh theih a la ni. MFA Super Cup hi club tan chuan season thar atana inenchhinna a ni dawn a, MPL club che ṭha lo tan chuan state pawn player leh foreigner thlenga an melh a ṭul dawn a ni.

Bethlehem VT FC-in coach thar Chawng­thansanga hnuaia an match hmasa ber an khel dawn a, Aizawl FC Academy U18 hi chetsual theihna ni mah se an chak loh chuan upset a ni ang.

Ramhlun North FC-in an match hmasa berah Third Division club Republic Vengthlang FC an hmachhawn dawn a, fixture awm danah MPL coach Lalruatliana Sailo a lawm a rinawm.

Vawiin hian Aizawl FC Academy, AFC Academy U16 leh MFA Grassroots te an inlan dawn bawk a, anni hi awmze neia football zir an nih avangin an inkhel en hi manhla pha tura ngaih a ni a. Kumin inelna match hmasa ber khel tur FC Venghnuai hi season liam taa Aizawl DFA hnuaia second division champion an ni a, first division an nih hnua an khingpui hmasa ber tur chu Bawngkawn FC an ni.

Vawiin Inkhel Tur
Group A - Lammual
10:00 AM FC Venghnuai Vs Bawngkawn FC
12:00 PM Bethlehem VT FC Vs AFC Academy U18
02:00 PM AFC Academy U16 Vs Durtlang FC
Group E - RG Stadium
11:00 AM Citizen FC Zotlang Vs Aizawl FC Academy
01:00 PM New Serchhip FC Vs MFA Grassroots
03:00 PM Ramhlun North FC Vs Republic VT FC