Mizoram Fight League a hmuhnawm nghal

Mizoram State Mixed Martial Arts Association leh Zonet ṭangkawpin an buatsaih, Mizoram Fight League chu Zirtawpni zan khan neih ṭan a ni a, fight a hmuhnawm nghal hle. MFL hi July an chawlh hnuah August-ah neih leh tur a ni ang.

R. Dengṭhuama Indoor Stadium, Mualpuia MFL match hmasa ber neih zanah ruah sur mah se MFL hmuh chak mipui kalna erawh a dal lo.

Team pali DSZ Fight Club, Juggernaut MMA, Promise Strivers leh BCA Brawlers fighter-te an inhmachhawn kual hnuah point 20 hlawh chhuaktu DSZ chu hmahruaitu an ni nghal.

Bul ṭanna chu

Inrinni zanah main card ṭan a nih hmain preliminary round-ah bout thum neih hmasak a ni a, Lalbiaksanga, B. Lallawmkima leh Lalruatdika ten an khingpui an hneh vek.

Preliminary round neih a nih zawhah flyweight hmeichhe fight hmuh nghal a ni a, Juggernaut MMA tana inlan

Lalvenhimi chuan rear naked choke hmangin BCA Brawlers fighter Zomuanpuii chu minute hnih leh second 21-na lekah a tlawm nghal.

Bout hnihnaah technical knock out kan hmu nghal a, featherweight-ah DSZ tana inlan Lalchhuanmawia chuan Juggernaut fighter Lalremruatsanga chu round hnihna lekah a kuttum a 'khilai' a, Ruatsanga'n 'kuttum' tam zawk a hmuh hmain Chhuanmawia hi chak zawkah puan a ni. Featherweight bout dangah BCA fighter Rosangzuala chuan unanimous decision-in Promise Strivers fighter C. Lalfakawma a hneh ve leh bawk.

Fight hmuhnawm

Middleweight bout-ah fight hmuhnawm kan hmu a, DSZ fighter Lalfamkima leh Jugger­naut pa chak Ngurlianzuala Sailo-te an inngam tawk hle. Mipui thawm ring tak karah Lalfamkima a dingchang a, Kolasib tlangval hian round hnihnaah Ngurlianzuala hi ngam taka a attack chhunzawm reng hnuah TKO hmangin chak zawkah puan a ni.

Flyweight-ah mipui hmuh chak Pathianmal­sawm­dawng­liana a inlan chhunzawm a, Juggernaut fighter che vel hmuh­nawm viau mah se Promise Strivers aiawh Vanlalchhuanga a duai bik lo, round thum an khelh zawh meuh erawh chuan hliam nei chunga inkhel PMS-a chu unanimous decision hmangin a chak zawk.

Beisei phak lo David

Bantamweight-ah David Chhangte lakah beiseina sang mah se Dengthanchhunga (Manova) hmaah a theihna a pholang thei lo. Round hnih naah Promise Strivers tana inlan Manova hian chiang zetin Juggernaut aiawh David hi a hnek fuh a, Shillong tlangval David-a'n ngai a awh leh tawh loh avangin TKO hmangin a tlawm.

Inrinni zana bout hnuhnung berah beisei loh result hmuh tur a awm. Promise Strivers tana inlan Lalṭhasanga lakah BCA fighter Jack Lalsangliana chu split decision hmangin chak zawkah puan a ni a, fighter pahnih inhmachhawn lai thlirin Ṭhasanga hi chak zawk niin lang mah se thlirtute leh judge-te ngaihdan a in ang lo.

Results Kimchang
Flyweight
Juggernaut MMA vs BCA Brawlers
Lalvenhimi, Khawhai/Bethlehem def.
Jacinta C. Zomuanpuii
(Submission, Rear Naked Choke, Round 1. 2:21)
Featherweight
DSZ vs Jaggernaut MMA
Lalchhuanmawia (Republic Vengthlang) def. Lalremruatsanga (Ṭhuampui)
(TKO at Round 2, 1:52)
Featherweight
BCA Brawlers vs Promise Strivers
Rosangzuala, Project Veng, Kolasib def.
C. Lalfakawma, Durtlang Leitan
(Unanimous Decision)
Middleweight
DSZ vs Juggernaut MMA
C. Lalfamkima Diakkawn, Kolasib def.
Ngurlianzuala Sailo, Lawngtlai
(TKO, Round 2, 2:27)
Flyweight
Juggernaut MMA vs Promise Strivers
Pathianmalsawmdawngliana, Kawrtethawveng def. Vanlalchhuanga, Dawrpui Vengthar
(Unanimous Decision)
Bantamweight
Promise Strivers vs Juggernaut MMA
Dengthanchhunga, Kulikawn def.
David Chhangte, Shillong
(TKO at Round 2, 1:42)
Middleweight
Promise Strivers vs BCA Brawlers
Jack Lalsangliana, Lunglei def.
Lalṭhasanga Lelhchun, Venghlui
(Split Decision)

Team Dinhmun
Hming Pts
DSZ Fight Club 20
Jaggernaut MMA 13
Promise Strivers 12
BCA Brawlers 3