Jeff Horn hmaah Pacman a tlawm

Rei tak boxing ring a rah loh hnuah Manny Pacquiao lokir leh mah se khawvel hriat hlawh lo Jeff Horn hmaah a tlawm a, WBO world welterweight title chu Australian boxer Horn hnenah hian hlan a ni.

Lang Park, Australia-a inhnekah hian Horn hi unanimous points decision-in 117-111, 115-113, 115-113 a chakah puan a ni a, mipui 50,000 hmaah inhnekah Pacman chu chak zawkah mi zawng zawngin ngai mah se judge pathum te ngaihdan a dang - hei tak hi boxing fan-ten an hrethiam lo.

Manny Pacquiao-a'n inhnek a hmachhawn hnu­­hnung pakuaah vawi li tlawm hmel a hmuhna a ni ta a, vawi 59 inhnek hma­­chhawn tawhin vawi sarih a tlawm a, vawi hnih a khingpui a inhnehtawkpui thung.

Result mak chu

Inhnek zawh a nih rualin Manny Pacquiao chu chak zawka puan tur angah mipuiin an ngai vek a, boxing expert-te ngaihdan a dang bik lo. ESPN reporter T.J. Quinn chuan, "Horn-a'n hnehna a chang kha thil awihawm loh tawp a ni a, anmahni rama inhnek a nih avangin duhsak a hlawh a ni," a ti a, ESPN commentator Stephen A. Smith chuan, "Hei hi maw Australia-in official min pek chu? Thutlukna dik lo hulhual a ni," a ti ve bawk.

Khawvel huapa sports columnist lar Skip Bayless chuan Horn-a khua Brisbane-a inhnek a nihna chuan result-ah nghawng a nei nia a hriat thu a sawi a, FOX Sports reporter Dieter Kurtenbach chuan 'Dawt' tiin result chungchang a sawi thung.

Lewis a lawm lo

Pacman leh Horn-a inhnek result-in infiamna khawvelah nghawng thui tak a nei a, vawi thum lai world heavyweight champion lo ni tawh Lennox Lewis chuan, "Pac kha engtin nge a chak loh theih? Judge ho nena kan inhnek en kha a in ang lo a ni," tiin result a sawisel.

American football quar­­terback Aaron Rodgers chuan, "Judge-te khan eng inhnek nge an en bik?" tih zawhna an siam a, Basketball legend Kobe Bryant chuan thlalak danglam tak nen inhnek chungchanga zawhna a siam ve bawk.

Tu nge Horn?

'The Hornet' tia hming­lem an pek Horn hian kum 11 kalta khan 'self defence' atan boxing a zir ve chauh a, college a kal laiin London 2012 Olympic-ah khan quarterfinal a lut. Kum 2013-ah professional huang a luhchilh a, vawi 18 inhnek a hmachhawnah vawi 17 hnehna changin vawi khat a khingpui a inhnehtawkpui. Pacman a hmachhawn hma hi chuan Brisbane-a Pallara State School-ah zirtirtu hna a thawk pah a, a inhnekna aṭang hian a chang chuan £1,100 lek te a hlawh ṭhin! Pacquiao nena an inhnek aṭang hian £383,832 a hlawhah ngaih a ni.

Pacman-a'n sawisel theih takin hnehna chang zo lo mah se judge-te thutlukna a zah thu a sawi a, "Judge-te thutlukna a ni a, kei chuan sawi tur ka nei lo," tiin puitling takin hnehna a chan loh chu a pawm.

Punch Stats
32% Total Punches 15%
573 Thrown 625
182 Landed 92
31% Jabs 10%
193 Thrown 197
59 Landed 19
32% Power Punches 17%
380 Thrown 428
123 Landed 73