MBA Junior Inter-School Badminton Tournament zo fel
Mizoram Badminton Association (MBA) buatsaih Mizoram chhung school hrang hrang inelna Saron Indoor Stadium-a khelh MBA Junior Inter-School Badminton Tournament 2017 chu Zirtawpni khan zawh a ni.
Inelna hi primary, middle leh high school level a neih niin mipa leh hmeichhe team a khelh a ni. Open-ah mipa leh hmeichhia singles khelh a ni bawk.
Team inelna bikah hian school hrang hrang aṭangin team 31 an tel a, primary (8), middle (16) leh high school (17) an chhuak. Primary leh middle level Boys Team leh Girls-ah English Congregation School an champion vek a, High school level-ah Synod HSS (Boys Team) leh Govt. Mizo HS (Girls Team) te an chak ber bawk.
Open inelna bikah category hrang hrang pangaah inelna neih niin shuttler 43 an inlan. Joseph VL Ringngheta (Boys Singles M/S), Lalṭhazuala (Boys Singles P/S), Laldintluanga Tlau (Boys Singles H/S), Laldingpuii (Girls Singles M/S) bakah Vanlalrindika leh Zomuansanga (Boys Doubles H/S) te an champion bawk.
Tun hnaiah MBA-in chanchin lawmawm a nei fo a, Badminton Association of India executive member K. Lianhmingthanga chu July thlaa neih tur All India Junior Ranking Badminton Tournament-ah Tournament Observer tura ruat a nih bakah Asian Junior Team Championship-ah India team manager a ni ang.