RG Stadium-ah mipui an pungkhawm Jeje leh Bhaichung ten goal an khung

Mizo player ṭha thlanchhuah Mizoram XI leh India rama footballer intel khawm pawl, Foot­­ball Players Association of India aiawh FPAI XI ten July 1, Inrinni khan Rajiv Gandhi Stadium, Aizawlah exhibition match an khel a, 2-2 in an inhnehtawk.

Mizoram XI hian first half-ah Samuel Lalmuanpuia leh Jeje Lalpekhlua te hmangin goal an khung a; inkhel dul hnuah FPAI XI-in Bhaichung Bhutia leh Seityasen Singh ten an siphurh an sut a, chak zawk an awm lo.

Fak phu mipui

Mizo mipuiin I League bo­ruak sang inkhel an thlir tawh a, exhibition match nen a inthlau dawn tih hre chungin RG Stadium an pan khawm a, Mizoten football an ngaina tih nemnghehin a awm.

Entu mipui tam lam hi I League-a inkhel entu ṭhat ṭum nen an intluk pha hial a, Mizo mipuiin chhiat tawk ṭanpui duhna thinlung an nei a, Mizo footballer ṭha leh India ram footballer ṭhate khel an hmu châk tih a lang bawk.

Exhibition match!

Mizoram XI-in ṭan phat aṭang­in chakin tumin an khel a, FPAI XI lakah an chungnung. East Ben­gal midfielder Lalrindika Ralte-in ball fing a pe thiam tih a pholang a, hmabak nei êng Zemabawk North tlangval Samuel-a'n minute 10-na lekah goal a khung.

FPAI XI lamah Jackiechand Singh leh CK Vineeth ten an tlan chakna hmangin entu mit an ti tlai a, Newcastle United striker hlui Michael Chopra erawhin a rilrua a theihna ang a tipha tawh lo.

Mizoram XI chu team ṭha zawk an ni a, an khingpuite inbuatsaihna a ṭhat loh avangin an thiamna ang pholan an harsat.

Minute 33-naah India striker Jeje-a'n Mizoram XI goal hnih­na a khung a, hemi hnu chuan exhibition match a nih angin a hmuhnawm zui tawh lo.

Half­time laiin FPAI Awards sem a nih avangin second half-ah inkhel hmuhnawmna a tlahniam lehzual.

Mizoram XI team enkawltu lamin player khelh kimtir hrim hrim an tum a, player thar luhtirin tlarhnunga defender pathum chiah dahin FPAI XI kawng an hawnsak - Indian legend Bhaichung Bhutia-a'n vawi li a ball chanah vawi thum tisual mah se chance ṭha bik erawh a hlah lo. Sik­kimese Sniper-in goal a khung aṭanga minute nganaah FPAI XI-in substitute Seityasen Singh hmangin an siphurh an sut a, hun a tawp a nghal bawk.

Tute nge khel?
Mizoram XI : Lalthuammawia (Lalmuanawma 46'); Lalrinzuala Khiangte (Lalramchullova 46'), Zohmingliana Ralte (Lalhmunmawia 46'), Lalrinchhana Tochhawng (William Lalnunfela 71'), Sena Ralte (Malsawmzuala 57'); S. Malsawmtluanga (C) (R. Laldanmawia 57'), Lalrindika Ralte (Lalfakzuala 71'), Lalrinchhana (Lalchhuanmawia 46', Brandon VL Remdika (Isaac Vanmalsawma 46'); Samuel Lalmuanpuia (F. Lalrinpuia 58'), Jeje Lalpekhlua
FPAI XI : Subrata Paul (Sandeep Nandy 46' (Abhijit Mondal 71')) ; Pritam Kotal (Naoba Singh 46'), Gouramangi Singh, Deepak Modal (C) (Gurjinder Singh 46'), Narayan Das (Rana Gharami 46'); Jackiechand Singh, Alfred Jaryan, Saran Singh, Hollicharan Narzary (Bhaichung Bhutia 70'); CK Vineeth, Michael Chopra (Seityasen Singh 54')

ZoFooty Statistics
Mizoram XI 2 - 2 FPAI XI
MIZ : Samuel Lalmuanpuia 10'; Jeje Lalpekhlua 33'
FPAI : Bhaichung Bhutia 85'; Seityasen Singh 90'
55% Ball Possession 45%
14(4) Shots (On Target) 15(4)
483(445) Pass (Completed) 396(348)
5 Fouls 6
4 Offsides 4
3 Corner Kick 3
0 Yellow Card 1
0 Red Card 0
Powered by Darchiauva Hardware, Mission Veng