Atletico tan Saul a rinawm

Spain midfielder Saul Niguez chuan a khelh mekna Atletico Madrid tana a rinawm zia lantir nan kum nga dang cham chhunzawm turin contract thar a ziak.

Kum 22 mi Saul hian 2007 khan Atletico academy hi a zawm a, tunah hian contract rei tak la nei mah se kum nga dang a ziah belh leh avangin kum 2026 thleng a cham chhunzawm dawn a, a vanglai zawng chu la Liga club tan a khel dawn tihna a ni. Atletico tan hian inelna hrang hrangah match 136 khelin goal 22 a khung tawh.

Feet 5 leh inches 11-a sang Saul hian European Under-21 khelh zawh takah khan goal nga khungin Golden Boot a dawng, an ram hi final a hruai thleng - Germany lakah si khat faiin a chak lo zawkah an ṭang thung.

Season liam ta khan Saul hian a club tan match 53 khelhah goal kua a khung a, heng a goal khung zinga pali chu Champions League-ah niin Diego Simeone kaih­hruaina hnuaiah player pawimawh a ni phak.

Saul chuan, "Atletico nen hian chhungkua kan ni a, ka tan chuan hmun dang ngaihtuah buai a ngai lo. Club-in ka chungah rinna an nghah ngam avangin ka lawm a, tun dinhmun ka thlen theih nana min puitu ka teammate leh coaching sfaff-te chungah lawmthu ka sawi bawk," tiin a sawi.