A hunah tak Novak Djokovic a tho

Beisei phak lo tia sawisel hlawh Novak Djokovic chuan a hunah tak Aegon International nomawi a chawi leh ta. Serbian tlangval tan kumin ATP World Tour season-a a nomawi pahnihna niin tennis a khelh tawh china a title 68-na a ni bawk.

Inrinni zan All England Club-a inkhelah Djokovic hian darkar khat leh minute 16 chhungin Gael Monfils lakah 6-3, 6-4 in hnehna a chang a, season tira Qatar Open nomawi a chawi hnua a champion lehna hmasa ber a ni, vawiin aṭanga khelh ṭan tur Wimbledon atan inrintawkna a neih belh phah tura ngaih a ni.

World number 4 Djokovic chuan, "Monfils nen vawi 14 kan inhmachhawn tawhah hnehna ka chang vek thei a, awih a har zawk hial. Ani hi player ṭha tak a ni a, chutihrualin kan intawn hian a vannei zawkah ka ṭang thei hle. Chawlhkar duhawm tak ka hmang a, kan hmabak chawlhkar hnih lo awm turah he boruak ṭha hi ka chhawm nun theih ka beisei," tiin a sawi.

Grand Slam vawi 12 cham­pion tawh Djokovic hian season hmasa chawhnu lam aṭangin beisei a phak lo chho a, world number 1 nihna Andy Murray lakah a hloh. Kuminah pawh result ṭha a neih theih miau loh avangin world ranking-ah pawh palinaah a tla hniam tawh a, vawi thum a champion tawhna Wimbledon-ah erawh seeded pahnihna a ni ang.

Djokovic chuan, "Wimbledon khel tura inbuatsaihna duhthusam a ni. Ka tan chawlhkar ṭha tak a ni, match li ka khelhah set ka hloh miah loh avangin ka lawm takzet," a ti. French Open leh Wimbledon hi a inhnaih avangin Djokovic hian a inkarah inelna a hmachhawn ngai meuh lo, tun ṭum hi tun hnai kum sarih chhunga grass court inelna lian hmachhawn tura inbuatsaihna tournament a khelh hmasak ber ṭum a ni.

Kum 30 mi Djokovic hian French Open-ah khan Andre Agassi chu coach lailawk atan a hmang a, ani nen hian Wim­bledon-ah pawh an thawk dun leh ang - tennis player hlui tho Mario Ancic chuan a coaching team hi a zawm bawk.

Djokovic hian Thawhlehni tlai dar 4:00-ah Wimbledon first round a khel ṭan ve dawn a, seeded chang phak lo Martin Klizan nen an inkhel ang. Slovakia tlangval Klizan hian tun hmain Wimbledon second round a la pelh ngaih loh avangin Djokovic hi chak tura rinkai zawk a ni.