Champions League aia La Liga ngai hlutu

Player a nih lai pawha Real Madrid tana ropui taka lo khel tawh ṭhin Zinedine Zidane hian January 2016 khan a vawi khat nan Real Madrid a enkawl ṭan a, La Liga (1), Spanish Super Cup (2), UEFA Super Cup (2), FIFA Club World Cup (2) leh Champions League (3)-ah te nomawi a chawi. 

May 2018-ah Real a chhuahsan a, a tel loa talbuai Real hian March 2019 khan an ko let. 2018-19 season chawhnu lamah beisei angin team a khai chhuak thei lo a, tun season ṭan a nih khan bul an ṭan ṭha lua lo bawk. Sawiselna tam tak a tawk a, coach ṭha huangah mi tam takin dah an harsat. Mahse, French manager hi a talbuai duh lo - result ṭha lo karah beiseina a nei a, a rilru a paukhauh a, Barca chetsual chu a hunah tak a chhawr ṭangkai a, league nomawi a chawi leh ta. Zidane hi match 19 dana champion ziah ang a ni!

Zidane-a'n a vawi hnih nan league nomawi a chawi a, La Liga aia a ngaihhlut zawk thu a sawi! French manager chuan, "Champions League chu Champions League a ni a, mahse La Liga hi ka tan chuan engkim a nih avangin min ti hlim zawk a ni," a ti. Kum 48 mi coach hian hlawhtlinna erawh amah vang ni loin a player-te vang a nih thu sawiin, "He nomawi hlawh chhuak tura beitute chu ka player-te an ni. Hna chu ka thawk ve ngei a, mahse rinna nena bei tlat te chu ka player te hi an ni," tiin a sawi. Real Madrid hian tunah chuan Champions League lam an hawi leh thei tawh. August 7 zanah last 16 second leg khel turin Etihad Stadium an tlawh dawn a, Manchester City hi first leg-ah 2-1 in an ngam tawh lo.