Europe rawlthar thiam ber Germany

Inrinni zan khan European Under-21 final khelh a ni a, Germany chuan Mitchell Weiser-a goal khat hmanga Spain hnehin a vawi hnih nan nomawi an chawi.

Weiser-a goal

Poland-a inkhelah Hertha Berlin winger Weiser hian minute 40-naah right back Jeremy Toljan-a cross chu angle zim tak aṭangin inkhela goal awmchun ni turin a tauh lut, chawlhlawk hmaa an goal khat neih an venhim tluan theih avangin kum 2009-a an champion tawhna an chhun­zawm leh ta a ni.

Tun ṭumah hian Spain hi rinkai zawk an ni, inelna an neih hnuhnung palia a vawi thum nan champion an tum hle. Mahse, Atletico Madrid midfielder Saul Niguez-a'n semifinal-a England hnehtu Germany tlarhnung a paltlang thei lo.

Germany hian kum 2009 khan final-ah England hnehin nomawi an chawi tawh, kha mi ṭum khan tuna an senior player nita Manuel Neuer, Mesut Ozil, Jerome Boateng, Sami Khedira leh Mats Hummels te hi an inlan.

Kumin Euro U21 hi Confe­derations Cup nen a inrual a, na­tio­nal team coach Joachim Low-a'n player naupang rual Rus­sia-ah a hruai chung pawhin a ṭha dang an la ngah tih a chiang.

An lungawi

Germany coach Stefan Kuntz-a'n semifinal-a England hmachhawn thei lo defender Niklas Stark a chhawr thei tawh a, an tlarhnung a phui zual sawt - tun tournament-a a vawi li nan goal an chhuah lo.

Kuntz chuan, "Inkhel ṭan hma khan player zawng zawng­in an theihna 100% an pek vek a ngaih thu kan sawi a, hmatawng nei hriam tak Spain kan hmachhawn dawn avangin inven uluk a ngaih tur thu kan sawi bawk. Kan ruahman dan ang taka kan khelh theih avangin kan lawm hle," a ti.

Spain hian semifinal-ah Italy 3-1 in an sawp a, final hma hian match riat an khelhah goal 21 khungin an lamah goal khat chiah a lut. Rinkai zawk ni chungin chak lo mah se Spanish coach Albert Celades-a'n a naute hnathawh a fak.

Player a nih laia Real Madrid leh Barcelona midfielder hlui Celades chuan, "First half kha kan tan hun ṭha a ni a, kan nawr na zawk bawk. A chak lo zawka kan ṭan avangin kan rilru a nain hrehawm kan ti, chutihrualin inelna kan khelh chhoh danah hmasawnna hmuh tur a tam a, ka nau ten fak an phu," a ti. Celades hian Germany rawl­tharte chuan nomawi chawi phu zawk khawpa an khelh ṭhat thu a sawi tel bawk.